ევროპარლამენტის სადამკვირვებლო მისიამ 2 ოქტომბერს ჩატარებული ადგილობრივი თვითმმართველობის არჩევნები და წინასაარჩევნო გარემო შეაფასა.
საერთაშორისო დამკვირვებლებთან ერთად გამართულ პრესკონფერენციაზე, ევროპარლამენტის მისიის ხელმძღვანელმა, მიშელ გალერიმ ქვეყანაში არსებულ პოლიტიკურ კრიზისზე, თავისუფალი და კონკურენტული გარემოს არარსებობაზე, დაშინების ფაქტებსა და ადმინისტრაციული რესურსის ბოროტად გამოყენებაზე ისაუბრა.
“გასული წლები თქვენი ქვეყნისთვის გახლდათ რთული არა მხოლოდ პანდემიის, არამედ დიდხნიანი პოლიტიკური დაპირისპირების გამო, რომელიც ჯერ კიდევ არ არის ეფექტიანად მართული და ამ ყველაფერმა სიტუაცია გაამწვავა. თავისუფალი და კონკურენტული გარემოს არარსებობა ხელს უშლის კანდიდატებს, რომ იმოღვაწეონ თანაბარ პირობებში. ეს ასევე უკავშირდება კომპეტენტურ უწყებებს, რომ დაშინების ფაქტები გამოიძიონ ეფექტიანად.
ასევე, ადგილი ჰქონდა ადმინისტრაციული რესურსების ბოროტად გამოყენებას. არ უნდა მოხდეს დაუსჯელობის სინდრომის გაგრძელება. ეს არის საკითხები, რომლებიც დაუყოვნებლივ უნდა მოგვარდეს. არჩევნების შემდგომ პერიოდშიც ვისურვებდით, რომ მთავრობამ და ყველა პოლიტიკურმა პარტიამ გაითვალისწინოს ამ საკითხების მოგვარება მშვიდობიან გარემოში. ჩვენ მოველით, რომ პოლიტიკურ კრიზისი დასრულდეს და გატარდეს უფრო მეტად მკვეთრი, საჭირო რეფორმები”, – თქვა გალერიმ.
ევროპარლამენტის მისიის ხელმძღვანელმა ასევე საარჩევნო უბნებზე დაფიქსირებულ ხარვეზებზე გაამახვილა ყურადღება.
“ზოგიერთი უბანი არ იყო ადაპტირებული შშმ პირებისთვის. ასევე იყო ფიზიკური დისტანციის დარღვევა ამომრჩევლების სიჭარბის გამო. მაგალითად, მარნეულში შევნიშნეთ დაძაბულობა რამდენიმე უბანზე. ეს განსაკუთრებთ უკავშირდებოდა დამკვირვებლებს და საუბნო საარჩევნო კომისიის წევრებს. პოლიცია ძალიან ახლოს იყო საარჩევნო უბნებთან ყოველგვარი მიზეზის გარეშე”, – თქვა მიშელ გალერიმ.
მანვე აღნიშნა, რომ საბოლოო ჯამში კენჭისყრის პროცესი მშვიდ გარემოში ჩატარდა.
“მსურს მივულოცო საქართველოს მოსახლეობას, რომ იყო მომწიფებული და მშვიდი საარჩევნო დღე. ეს მნიშვნელოვან წვლილს შეიტანს ევროკავშირისკენ მიმავალ გზაზე”, – აღნიშნა ევროპარლამენტის მისიის ხელმძღვანელმა.
კომენტარები