“სააკაშვილი პასპორტით ვერ წარდგებოდა მესაზღვრესთან, ან აეროპორტში… კონსპირაციული დაცვა რომ არ ყოფილიყო, ეს ამბავი ასე მშვიდობიანად ვერ მოხდებოდა” – ხერხეულიძე

“ენმ”-ის წევრი, ეკა ხერხეულიძე, რომელმაც დღეს დაადასტურა, რომ სააკაშვილი საქართველოშია და თქვა, რომ მასთან ვიდეოზარითაც ისაუბრა, “ტვ პირველთან” ამბობს:

“ვერ გეტყვით, რა დროს ვესაუბრე, მაგრამ ნამდვილად იყო ბათუმში.

დღისით, მზისით, პასპორტით უნდა წარდგენილიყო საზღვარზე? სააკაშვილი ამ ხელისუფლების და რუსეთის მიერ არის ძებნილი, მას გადაადგილების შეზღუდვა სხვა, ნორმალურ, დემოკრატიულ ქვეყანაში არ აქვს. სააკაშვილი ვერ შემოვიდოდა, რადგან არ უშვებენ და არა იმიტომ, რომ არ იცის, როგორ შემოვიდეს. საზოგადოებას უნდა შევახსენოთ ფაქტი, რომ პასპორტით ვერ წარდგებოდა მესაზღვრესთან, ან აეროპორტში, არც თვითმფრინავს დასვამდნენ და არ განხორციელდებოდა მისი მიზანი.

ასეთი მშვიდობიანი დაუბრკოლებელი გზით ვერ მოხერხდებოდა ეს ამბავი, კონსპირაციული დაცვა რომ არ ყოფილიყო.

ჩემი წარმოდგენით, 3 რიცხვამდე გავრცელდება მიმართვა სააკაშვილის და 3-ში იქნება ის შეხვედრა, რომელიც მან დაანონსა.

ისეთ ტრაგიკულ მდგომარეობაში არიან, ისეთ განცხადებებს აკეთებენ, ამბობენ, შემოვიდა, ვიდეო გადაიღო და გავიდაო…

განვიხილოთ ეს ვერსიაც – შემოსვლა, როგორი რთულიც არის ამ ხელისუფლებისგან ძებნილი ადამიანი, ისეთივე წესების დაცვას მოითხოვს გასვლაც. თუ მიხეილ სააკაშვილი შემოვიდა და გავიდა ისე, რომ ვერ შემაჩნიეს, ორმაგი უბედურება სჭირს მაშინ ხელისუფლებას და ჩამოქცეულია ყველა ინსტიტუტი.

მეორე, თუ ჩვენ იმ შეთქმულებაში შევალთ, რომ ივანიშვილი და სააკაშვილი ერთმანეთს ურიგდებიან, მაშინ სააკაშვილი ძებნილი არ იქნებოდა.

რა უნდა ვამტკიცოთ, რომ სააკაშვილი მშიშარა არ არის? ის უსისსხლოდ მოტანილი მიღწევები ვისი არის?”