საქართველოს გენერალური პროკურორის მოადგილემ ნათია მერებაშვილმა გაეროს ბავშვთა ფონდის მიერ გამართულ მეორე საერთაშორისო კონფერენციაზე – „ბავშვთა უფლებების საკითხების ჩართვა საუნივერსიტეტო საგანმანათლებლო პროგრამებსა და კურუკულუმებში“ არასრულწლოვანთა მართლმსაჯულებაში პროკურორთა და პროკურატურის გამომძიებელთა სპეციალიზაციის პროცესზე ისაუბრა.
როგორც ნათია მერებაშვილმა კონფერენციაზე აღინიშნა, არასრულწლოვანთა მართლმსაჯულებაში სპეციალიზებულ პირთა გადამზადებას განგრძობადი ხასიათი აქვს. მისი თქმით, მუდმივად ხორციელდება სპეციალიზებული პროკურორების, გამომძიებლების, მოწმისა და დაზარალებულის კოორდინატორების პროფესიული განვითარება და მათი გადამზადება პერიოდულად ხდება შემდეგი მიმართულებებით: შეზღუდული შესაძლებლობის მქონე პირებთან კომუნიკაცია; არასრულწლოვანთა შრომითი და სექსუალური ექსპლუატაცია; ბავშვთა პორნოგრაფია; ანტიდისკრიმინაციული საკითხები ადამიანის უფლებათა ევროპული კონვენციის მიხედვით; სამართლიანი სასამართლოს სტანდარტები ადამიანის უფლებათა ევროპული კონვენციის მიხედვით. ასევე, ოჯახური ძალადობის დანაშაულებსა და სქესობრივი ხასიათის დანაშაულებში სპეციალიზაციის კურსს გადიან არასრულწლოვანთა მართლმსაჯულებაში სპეციალიზებული პროკურორები და პროკურატურის გამომძიებლები.
არასრულწლოვანთა მართლმსაჯულების პროცესის ეფექტიანი განხორციელების, სისხლის სამართალწარმოების პროცესში ბავშვის საუკეთესო ინტერესების უზრუნველყოფისა და ბავშვზე მორგებული მართლმსაჯულების უზრუნველყოფის მიზნით, სპეციალიზაციის სტანდარტის უზრუნველყოფასთან ერთად, პროკურატურა მთელ რიგ სხვა ღონისძიებებს ახორციელებს. მიმდინარეობს არასრულწლოვანთა მიერ და მიმართ ჩადენილ დანაშაულთა სისხლის სამართლის საქმეების მონიტორინგი, რომლის შედეგად გამოვლენილი გამოწვევების გადაჭრის მიზნით ხდება რეკომენდაციებისა და სახელმძღვანელო მითითებების შემუშავება, ყოველწლიურად მონიტორინგის შედეგების გაანალიზება და მათი შესაბამის ანგარიშში ასახვა. ასევე, ყოველწლიურად მზადდება კანონთან კონფლიქტში მყოფ არასრულწლოვანთა მახასიათებლების კვლევა. არასრულწლოვანთა მართლმსაჯულების კოდექსის ეფექტიანი იმპლემენტაციის ხელშეწყობისა და რეგიონულ დონეზე არსებული გამოწვევების იდენტიფიცირების მიზნით, ყოველწლიურად იმართება არასრულწლოვანთა ადგილობრივი მულტიდისციპლინური საბჭოს სხდომები არასრულწლოვანთა მართლმსაჯულებაში ჩართული ყველა პროფესიონალის მონაწილეობით. ასევე, პროკურატურა ბავშვზე მორგებული გარემოს კონცეფციას რეგიონებში ეტაპობრივად აფართოებს.
ნათია მერებაშვილის თქმით, მნიშვნელოვანია უმაღლესი საგანმანათლებლო დაწესებულებების სამართლის საბაკალავრო და სამაგისტრო პროგრამები იძლეოდეს შესაძლებლობას სტუდენტმა მიიღოს ცოდნა ბავშვის უფლებების, არასრულწლოვნის საუკეთესო ინტერესის, არასრულწლოვანთა მართლმსაჯულების ძირითადი საერთაშორისო სამართლებრივი აქტების, ბავშვის უფლებათა კოდექსისა და არასრულწლოვანთა მართლმსაჯულების კოდექსის შესახებ.
ბათუმის სახელმწიფო უნივერსიტეტში გამართულ კონფერენციაზე ბავშვთა უფლებებთან დაკავშირებულ განათლების საკითხებზე მოხსენებები ასევე წარადგინეს დიპლომატებმა, უმაღლესი საგანმანათლებლო დაწესებულებების წარმომადგენლებმა და საჯარო უწყებების ხელმძღვანელმა პირებმა.
საქართველოს პროკურატურა სტუდენტებისთვის პრაქტიკული გამოცდილების გაზიარების მიზნით, უმაღლეს სასწავლო დაწესებულებებთან აქტიურად თანამშრომლობს. პროკურატურა ბავშვთა უფლებებისა და არასრულწლოვანთა მართლმსაჯულების შესახებ მომავალ პროფესიონალებში ცოდნის ამაღლების ხელშეწყობისთვის, უნივერსიტეტებთან თანამშრომლობას კვალავაც გააგრძელებს.
კომენტარები