“არ ვიცი ვიდეოში რას ამბობს ექიმი ჩემზე” – სად მიდის “ირანელი პაციენტი” კარანტინიდან?

ცნობილი ირანელი, რომელიც სოციალურ ქსელში პოპულარული გახდა და ამჟამად აბასთუმანში, იზოლაციაში იმყოფება, კარანტინს 3 დღეში დატოვებს. იგი პოპულარული მას შემდეგ გახდა, რაც გავრცელდა ვიდეო, როგორ აბრუნებს მას ექიმი ინფექციური საავადმყოფოს შენობაში ჟურნალისტებთან საუბრის დროს.

შაჰაბი სოციალურ ქსელში აქტივობით გამოირჩევა და თითქმის ყოველ დღე „ლაივ“ ვიდეოებს რთავს, ყვება სასტუმროზე, ექიმებზე და ზოგჯერ მღერის კიდეც.

„პრაიმტაიმთან“ საუბრისას შაჰაბი ამბობს, რომ კარანტინის შემდეგ ის თბილისში ჩამოსვლას აპირებს, თუმცა კონკრეტული გეგმები ჯერ არ აქვს.

„პირველად ვარ საქართველოში. თავიდანვე ჩამოვედი როგორც ტურისტი. 3 დღის შემდეგ დავტოვებ კარანტინს და ვაპირებ, თბილისში წავიდე. ჯერჯერობით არ ვიცი რამდენ ხანს დავრჩები თბილისში, არც ის მაქვს დაგეგმილი რას გავაკეთებ, როდესაც კარანტინს დავტოვებ. თეირანში უნდა წავსულიყავი, მაგრამ ყველა ჩემი ფრენა გაუქმებულია. ამიტომ ჯერჯერობით, არ ვიცი რას გავაკეთებ. ერთი წლის შემდეგ სტამბოლში წასვლასაც ვაპირებ“,- ამბობს ირანელი ტურისტი.

„ჩემი ოჯახი ამჟამად ირანშია, ყოველთვის ვეკონტაქტები მათ. აქ მარტო ჩამოვედი. პროფესიით ინჟინერი ვარ და ირანში ერთ-ერთ კომპანიაში ვმუშაობ.

ჩემთვის არ აქვს მნიშვნელობა პოპულარული ვიქნები თუ არა. ახლა მინდა, რომ დავასრულო კარანტინი და ჩემს სასტუმროში დავბრუნდე, რადგან ის თავიდანვე დავჯავშნე. ზოგადად, ძალიან მომწონს თქვენი ქვეყანა, ხალხიც კარგია და ექიმებიც“,- აღნიშნავს ირანელი ტურისტი.

ჩვენს კითხვაზე, იცის თუ არა, რას ამბობს ექიმი გავრცელებულ ვიდეოში მასზე, შაჰაბი გვპასუხობს, რომ მან არ იცის, არ ესმის და არც არავის გადაუთარგმნია მისთვის ეს სიტყვები, თუმცა მუდმივად აღნიშნავს, რომ „ჩვენთან ექიმები კარგები არიან“.