ბოლო ერთი წლის განმავლობაში, საქართველოს მასშტაბით კერძო სკოლები 2 805-მა მოსწავლემ დატოვა.
თუ 2019-2020 სასწავლო წლის დასაწყისში კერძო სკოლებში 62 771 მოსწავლე ირიცხებოდა, 2020-2021 წლის სასწავლო წლის ანალოგიურ პერიოდში 59 966-მდე შემცირდა. ეს მაჩვენებელი ალოგიკურია იმ ტენდენციასთან მიმართებით, რომელიც ბოლო 10 წლის განმავლობაში კერძო სკოლების მიმართ ფიქსირდებოდა.
როგორც კერძო სკოლაში მყოფი მოსწავლეების მშობლები აცხადებენ, სწავლების დისტანციურ ფორმატში, მათი შვილები იმ დონის განათლებას ვერ იღებენ, რასაც სკოლები ჰპირდებოდნენ.
მათივე განმარტებით, ცალკე პრობლემას წარმოადგენს სწავლასთან და არსებულ პირობებთან შეუსაბამო გადასახადის მაღალი ოდენობაც.
როგორც თბილისში არსებული ერთ-ერთი კერძო სკოლის პედაგოგმა (მისივე სურვილით არ ვასახელებთ მის სახელსა და გვარს) TIA.GE-სთან საუბარში განმარტა, პანდემიამდე პერიოდში სწავლება უფრო ეფექტიანი და ხარისხიანი იყო, რადგან დისტანციურ რეჟიმზე გადასვლისას ხშირად იჩენს თავს ტექნიკური ხარვეზები.
“სასკოლო რეჟიმში ბევრად ადვილია მოსწავლის გაკონტროლება. კერძოდ, მობილიზებულია თუ არა მოსწავლე, ჩართულია თუ არა საგაკვეთილო პროცესში. მოსწავლის ჩართულობის ხარისხის გაკონტროლება რთულია დისტანციური სწავლებისას. ეს სწავლის ხარისხზეც მოქმედებს უარყოფითად” – აცხადებს ის.
კითხვაზე, რატომ ტოვებენ მოსწავლეები სასწავლებელს, კერძო სკოლის პედაგოგი ამას პანდემიის გამო შექმნილი ეკონომიკურ კრიზისით ხსნის.
“ძალიან ბევრი ადამიანი დარჩა უმუშევარი. ეს დაეტყო მცირებიუჯეტიან კერძო სკოლებს – მშობლები ვერ იხდიან სწავლის საფასურს. თუმცა ისიც უნდა აღინიშნოს, რომ ზოგიერთი მშობელი ვერ ხედავს თანხის გადახდის აუცილებლობას დისტანციურ სწავლაში”, – აცხადებს ჩვენთან საუბარში მასწავლებელი.
წყარო – tia.ge
კომენტარები