რა ხდებოდა თვითმფრინავის სალონში „თბილისი-ვენის“ რეისისას – ბორტგამცილებლების კომენტარი

ფოტო – იმედინიუსი

„აირზენას“ კუთვნილი „ბოინგით“ „თბილისი-ვენის“ რეისის შესრულებისას ხომალდის ხელმძღვანელმა გამოაცხადა, რომ ვბრუნდებოდით თბილისში. მან სრულყოფილად წაიკითხა ინფორმაცია არსებული პრობლემის შესახებ, – თვითმფრინავის სალონში შექმნილ ვითარებაზე „იმედის დღის“ ეთერში ბორტგამცილებლებმა ილაპარაკეს.

„შემდეგ ჩვენ გამოვედით თვითმფრინავის სალონში, რათა გვეპასუხა მგზავრების კითხვებზე. მგზავრებს ამომწურავი ინფორმაცია მივაწოდეთ, დავამშვიდეთ. პანიკა არ ყოფილა, იყო კითხვები, ცოტა აღელდნენ, შემდეგ დამშვიდდნენ და ყველაფერმა კარგად ჩაიარა“, – განაცხადა ბორტგამცილებელმა ლიკა ბუჯიაშვილმა.

რა რეაქცია ჰქონდათ მგზავრებს, მაშინ როცა თვითმფრინავი თბილისის თავზე ფრენებს ასრულებდა? ამ კითხვაზე პასუხად ბორტგამცილებელებმა განმარტეს, რომ მგზავრებს ამის შესახებ დეტალურად აცნობეს. „ავუხსენით, რომ ახლა საწვავს ვწვავთ, ასეთი პროცედურაა, საჭიროა. მგზავრებმა ინფორმაცია მშვიდად მიიღეს“, – აღნიშნა ბუჯიაშვილმა.

როგორც თბილისი-ვენის ავიარეისის ბორტგამცილებლები აცხადებენ მათ ამ ინციდენტისას შიშის მომენტი არ ჰქონიათ. „მეოთხე წელია ბორტგამცილებელი ვარ. ყველა სიტუაციას ეჩვევი, არ იბნევი, გრძნობ პასუხისმგებლობას. შიშს პროფესიული მოვალეობა გადაწონის“, – განაცხადა მარი მურინეცმა.

5 სექტემბერს, თბილისი-ვენის ავიარეისის შესრულებისას „აირზენას“ კუთვნილი „ბოინგი“, რომელსაც აფრენის შემდეგ ტექნიკური პრობლემა შეექმნა, თბილისის აეროპორტში უსაფრთხოდ დაჯდა.