არა ძალადობას, მედიაზე ძალადობა მიუღებელია, საქართველო საფრთხის წინაშეა – ამ ლოზუნგით ბელგიაში მცხოვრებმა ემიგრანტებმა საქართველოს თავისუფალი მედიის მხარდამჭერი აქცია გამართეს. ისინი საქართველოს საელჩოს წინ შეიკრიბნენ და 5 ივლისს ქართველ ჟურნალისტებზე მომხდარი ძალადობა გააპროტესტეს.
სამეფოში მცხოვრებმა აქტივისტებმა საკონსულოს ცენტრალურ შესასვლელთან დატოვეს ბანერები, ასევე, წარწერები: “მედიაზე ძალადობა მიუღებელია”, “საქართველოში ჟურნალისტებს სცემენ და კლავენ”, “საქართველო საფრთხეშია”, “ადამიანის უფლებები ირღვევა” და ა.შ.
“სახლში ვერ გავჩერდით, რეალურად, რუსთაველზე უნდა ვმდგარიყავით, მაგრამ საქართველოში არ ვართ და ვერ ვახერხებთ, ამიტომ გადავწყვიტეთ, ბრიუსელში, საქართველოს საელჩოსთან გაგვეკეთებინა ეს ყველაფერი”, — ამბობს მონიკა თიგიშვილი.
“აქცია სპონტანურად დაიგეგმა, მას შემდეგ, რაც გავრცელდა ტრაგიკული ცნობა იმის შესახებ, რომ ტელეკომპანია პირველის ოპერატორი გარდაიცვალა. გულზეხელდაკრეფილები ვერ ვიჯდებოდით, ის ადამიანები, რომელბიც წლების განმავლობაში ვაპროტესტებდით სხვადასხვა უმცირესობების, ადამიანის უფლებების დარღვევის ფაქტებს. ვფიქრობთ, ევროპამ სანქციები უნდა დაუწესოს საქართველოში ღიად მოქმედ, პრორუსულ ძალებს, რომლებიც ჩვენი ქვეყნის და მთლიანად ცივილური სამყაროს წინააღმდეგ მოქმედებენ – გვითხრა აქტივისტმა და ჟურნალისტმა ემზო კვარაცხელიამ.
აქტივისტების ცნობით, თვის ბოლომდე, დაგეგმილია უფრო მასშტაბური აქცია ევროპარლამენტთან, სადაც, ბელგიაში მცხოვრები ქართველები, დახმარებისთვის ევროპარლამენტარებს მიმართავენ.
კომენტარები