ზესტაფონში სუფრაზე დაწყებული დაპირისპირება მკვლელობით დასრულდა. “კურიერის” ინფორმაციით, მოკლული ხარაგაულში მცხოვრები 31 წლის ვანო ბანცაძეა. ის პროფესიით მექანიკოსი იყო.
ვანო ბანცაძე ზესტაფონში მეგობართან სტუმრად იმყოფებოდა, სუფრასთან დაპირისპირება მოხდა, რომელიც მკვლელობით დასრულდა. ამ ეტაპზე უცნობია, იცნობდა თუ არა მოკლული მამაკაცს, რომელმაც იარაღიდან გასროლით, სასიკვდილო ჭრილობები მიაყენა.
ვანო ბანცაძეს სამართალდამცავის კუთვნილი იარაღიდან ესროლეს. მედიის ცნობით, მკვლელობა დანაშაულის იარაღის მფლობელი პოლიციელის ბიძამ ჩაიდინა, რომელიც უკვე დაკავებულია.
საქართველოს პროკურატურამ ზესტაფონში მომხდარ მკვლელობასთან დაკავშირებით განცხადება გაავრცელა, რომლის მიხედვითაც საქმეზე სამი ადამიანია დაკავებული, მათ შორის ერთ-ერთი რაჭა-ლეჩხუმისა და ქვემო სვანეთის პოლიციის დეპარტამენტის ინსპექტორ-გამომძიებელია, რომელსაც ცეცხლსასროლი იარაღისა და საბრძოლო მასალის გადაცემას ედავებიან. მის მიმართ სისხლის სამართლის საქმე ცალკე წარმოებად გამოიყო და გამოძიებას პროკურატურა აწარმოებს.
დაკავებულია კიდევ ორი პირი, ერთი, რომელმაც გულმკერდის არეში ესროლა ვანო ბანცაძეს და მეორე – ვინც სამხილების გადამალვა სცადა.
კომენტარები