დავიჯეროთ, რომ 50 ათას ლარს დღეში ემიგრანტები რიცხავენ? – მდინარაძის კითხვა რიონის ხეობის მცველებს და ემიგრანტებს

ფრაქცია „ქართული ოცნების“ თავმჯდომარე მამუკა მდინარაძემ „ნამახვანჰესის“ აქციების დაფინანსების საკითხზე საუბრისას განაცხადა:

„ეს კითხვები საჭიროებს სწორ განმარტებას. არ ვიცი, რამდენად დამაჯერებელია, რომ ემიგრანტები ამას უზრუნველყოფენ. არ ვიცი, რამდენად შეიძლება, დავიჯეროთ, რომ 50 ათას ლარს დღეში ემიგრანტები რიცხავენ. ეთერში არ ჯდები და დებატებში მონაწილეობას არ იღებ, არგუმენტებს ზოგადად ამბობ და ხარვეზებზე მიუთითებ, რომელ ხარვეზებზეც იცი, რომ უდიდესი ნაწილი, რომელიც ჰქონდა იუსტიციის სამინისტროს, აღმოფხვრილია. შეიძლება, რაღაც დეტალებზე საუბარი კიდევ გავაგრძელოთ, ამ დროს პირიქით, ამატებ მოთხოვნას, რომ არა თუ „ნამახვანჰესი“, არამედ უნდა გაჩერდეს ყველა ჰესი და საქართველოს ენერგეტიკას სერიოზული ზიანი მიაყენოს. ეს არ მგონია სწორი მიდგომა იყოს.

ერთი რამ ნამდვილად ვიცი, რომ საქართველოს ენერგოუსაფრთხოებისა და ენერგოდამოუკიდებლობის წინააღმდეგ ბრძოლა ქართულ ინტერესებში ნამდვილად არ ზის. ასევე არ ზის ხელოვნური, აბსოლუტურად ჰაერიდან მოტანილი და გაბერილი კრიზისი ქართულ ინტერესებში. თუ ვხედავთ, რომ ამ ქვეყანაში გარკვეული ჯგუფი არის, რომელიც როგორც ხელოვნურ კრიზისს, ასევე აქციებს უზრუნველყოფს რეალურად ენერგოდამოუკიდებლობის წინააღმდეგ, აქ რა თქმა უნდა, მთლად კეთილმოსურნის კვალი არ შეიძლება, დავინახოთ“

შეგახსენებთ, რომ ირაკლი კობახიძე დარწმუნებით ამბობს, რომ იცის, აქცია დაფინანსებულია დიდი ფულით, მამუკა მდინარაძე კი, მხოლოდ მოსაზრებას გამოთქვამს და მისი არგუმენტია ვარაუდია – “დავიჯეროთ, რომ 50 ათას ლარს დღეში ემიგრანტები რიცხავენ”. რის საფუძველზე საუბრობს კობახიძე მტკიცებით ფორმაში და რატომ არ აცნობს გუნდის წევრებს იმ ინფორმაციას, რასაც მისივე თქმით, ფლობს, უცნობია.