5 ივლისს რუსთაველის გამზირზე საქართველოს პირველი არხის ოპერატორ ილია თვალიაშვილის მიმართ ფიზიკური ძალადობისა და ძალადობის მუქარით პროფესიულ საქმიანობაში ხელის შეშლის ფაქტზე დაკავებულ სამ პირს – გიორგი მაღრაძეს, გიორგი წარუაშვილსა და ცოტნე ჩიხლაძეს ბრალდება დაუზუსტდათ.
სახელმწიფო ბრალდებამ დაკავებულებს ჯანმრთელობის განზრახ მძიმე დაზიანების მუხლი (117) დაუმატა, რაც სამიდან ექვს წლამდე თავისუფლების აღკვეთას ითვალისწინებს.
„სამ ბრალდებულს – გ.მ.-ს, გ.წ.-სა და ც.ჩ.-ს ბრალდება დაუზუსტდათ სსკ-ის 225-2 ნაწილით, 156-ე მუხლის მე-2 ნაწილის „ა“ და „გ“ ქვეპუნქტით, 154-2 მუხლით და 117-ე მუხლის მე-3 ნაწილის „ა“ და მე-5 ნაწილის „ე“ ქვეპუნქტით (ჯანმრთელობის განზრახ მძიმე დაზიანება, ჩადენილი ჯგუფურად, მსხვერპლის სამსახურებრივ საქმიანობასთან დაკავშირებით)“, – აცხადებენ პროკურატურაში.
შეგახსენებთ, 5 ივლისს რუსთაველის გამზირსა და მიმდებარე ტერიტორიებზე „თბილისი პრაიდის“ მოწინააღმდეგეებმა ჟურნალისტებისა და ოპერატორების მიმართ აგრესიული ქმედებები განახორციელეს, რის შედეგადაც დაშავდნენ სხვადასხვა მედიასაშუალების წარმომადგენლები, მათ შორის საზოგადოებრივი მაუწყებლის ოპერატორი – ილია თვალიაშვილი.
კომენტარები