შსს–ს ცნობით, 103 კილოგრამამდე ნარკოტიკული საშუალება ,,მეტამფეტამინი“ ამოიღეს, ერთ–ერთი კომპანიის მანქანიდან, ნარკოტიკი სხვა ქვეყნიდან შემოვიდა და მესამე ქვეყანაში უნდა გაეტანათ და საქმეზე მხოლოდ ერთი პირია დაკავებული.
სამართალდამცველების მიერ ამოღებულია განსაკუთრებით დიდი ოდენობით – 103 კილოგრამამდე ნარკოტიკული საშუალება ,,მეტამფეტამინი“, რომლის საბაზრო ღირებულება ე.წ. შავ ბაზარზე დაახლოებით 30 მილიონ ლარს შეადგენს.
განსაკუთრებით დიდი ოდენობით ნარკოტიკული საშუალების უკანონო შეძენა-შენახვის და საქართველოში უკანონოდ შემოტანის ფაქტზე, დაკავებულია ერთი პირი.
სისხლის სამართლის საქმეზე ჩატარებული გამოძიებით დადგინდა, რომ ერთ-ერთი კომპანიის კუთვნილი სატვირთო ავტომობილი, რომელიც დატვირთული იყო კაუსტიკური სოდით, საქართველოში მეზობელი ქვეყნიდან შემოვიდა და მესამე ქვეყანაში უნდა გასულიყო.
სამართალდამცველებმა, ტვირთის დეტალური დათვალიერებისას, ტომრებში გადანაწილებული, განსაკუთრებით დიდი ოდენობით ნარკოტიკული საშუალება აღმოაჩინეს, – წერს უწყება.
შსს აცხადებს, რომ დამნაშავეების ძებნას განაგრძობს.
უწყების ცნობით, გამოძიება საქართველოს სისხლის სამართლის კოდექსის 260-ე და 262-ე მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.
კომენტარები