ვის შეუძლია 24 საათიანი აფთიაქებით სარგებლობა?

საქართველოში კარანტინია გამოცხადებული და კომენდანტის საათი 21.00 საათიდან 06.00 საათამდე.

ყველაფერი დაკეტილია – გარდა აფთიაქებისა.

მოქალაქეებმა ჩათვალეს, რომ აფთიაქები რადგან ღიაა, მათი გამოყენების უფლება ექნებათ და მოგვმართეს კითხვით – ვინ გასცემს, ან გაიცემა თუ არა, დროებითი საშვები ან ნებართვები აფთიაქში წასასვლელად?

ერთ მოქალაქეს კბილი ასტკივდა, მეორეს შვილმა ხელი დაიწვა – ორთავეს დასჭირდა წამალი, რომელიც მათივე სახლის გვერდით, ღია აფთიაქში თავისუფლად იყიდება, მაგრამ აფთიაქამდე მისვლის უფლება არა აქვთ.

“ალია” დაუკავშირდა მთავრობის საკოორდინაციო საბჭოს ცხელ ხაზს:

-როგორ შეგვიძლია საღამოს 9 საათის შემდეგ აფთიაქში წამლის ყიდვა?

-არ შეგიძლიათ, საერთოდ არ უნდა გახვიდეთ გარეთ.

-აბა, აფთიაქები ვისთვის არის ღია?

-იმ ადამიანებისთვის, ვისაც უფლება აქვს ამ კომენდანტის დროს გარეთ გავიდეს, პოლიცია, მედპერსონალი…

-ჟურნალისტები, მეპურები…

-დიახ.

-ხო, მაგრამ მაგ პრინციპით, მაგ ხალხისთვის მაღაზიებიც შეიძლება იყოს გახსნილი.

-მთავრობის გადაწყვეტილებით, როგორც უკვე მოგახსენებთ, ასეა.

-თქვენ რომელ საათამდე მუშაობთ?

-დილის 9 საათიდან ღამის 12 საათამდე.

-24 საათი არ მუშაობთ ცხელი ხაზი?

-არა

-მთავრობამ 24 საათი ვმუშაობო და არ ვიცი, აი, ჟურნალისტებთან, მართლა შეგიძლიათ დღე-ღამის ნებისმიერ დროს დარეკვა. რომელი სამინისტროს ცხელი ხაზი მუშაობს 24 საათი?

-არ ვიცი, ეგ კონკრეტულად სამინისტროებში დარეკეთ და გეტყვიან.

-თქვენ ხომ ხართ მთავრობის გაერთიანებული საკოორდინაციო საბჭოს ცხელი ხაზი? ყველა სამინისტრო ხომ გეხებათ? რომელი სამინისტროს ცხელი ხაზი მუშაობს 24 საათით?

-დამელოდეთ… (1 წუთის შემდეგ) არც უფლება მაქვს რომ გითხრათ და არც ინფორმაცია გვაქვს ამის შესახებ.

-ცუდია.

ალია

  •  
  •  

კომენტარი

  1. ვააა?!

    😂ღამის 12 საათიდან,, ცხელი ხაზი “ ცივდებაა?!

კომენტარის დატოვება

თქვენი ელფოსტის მისამართი გამოქვეყნებული არ იყო.