“15 წლის წინანდელი გაზის გამოყენება ახლა შეიძლება?” – უტიაშვილი კობახიძეს პასუხობს

შინაგან საქმეთა სამინისტროს საინფორმაციო-ანალიტიკური დეპარტამენტის ყოფილი დირექტორი, შოთა უტიაშვილ;ი, ირაკლი კობახიძეს პასუხობს:

„რა კავშირი შეიძლება ჰქონდეს საინფორმაციო-ანალიტიკურ დეპარტამენტს და ქიმიურ იარაღს? მე არც ვიცოდი, რა შეიძინეს, არც უნდა მცოდნოდა. მე ვერაფერს დავადასტურებ. არც ის ვიცი, იყიდეს თუ არა და არც ის – რა შემადგენლობა ჰქონდა [ნივთიერებას].

თვითონაც ხომ იციან, რომ არანაირი შეხება არ შეიძლება ამასთან მქონოდა. არც ქიმიური იარაღის ექსპერტი ვარ და არც ანალიტიკური დეპარტამენტის საქმეში შედიოდა ამის შეტანა და გამოტანა. ჩემს მოვალეობაში შედიოდა ანალიტიკური საქმიანობა და შსს-ს საინფორმაციო ბაზების შენახვა, განვითარება და ა.შ.

ახლა შსს-ს სტრუქტურა აღარ ვიცი, მაგრამ მაშინ ეს უნდა სცოდნოდა იმას, ვინც იყენებდა ანუ განსაკუთრებულ დავალებათა დეპარტამენტს და სამეურნეო სამსახურს.

ჯერ ერთი, რომ ამათ [შსს-ს ხელმძღვანელობას “ოცნების” მთავრობის პირობებში] უნდა სცოდნოდათ, რა ინვენტარი გადაიბარეს წინა ხელისუფლებისგან და მეორე, მე მართლა არ ვიცი, 15 წლის წინანდელი გაზის გამოყენება ახლა შეიძლება? მე ამის არანაირი კომპეტენცია არ მაქვს. თუ შემოვიდა ასეთი ნივთიერება, უსაბუთოდ ხომ არ შემოვიდოდა. საბუთიც იქნება, ხელმომწერიც და ვინ ვისგან და რატომ იყიდა.

ახლა, უბრალოდ, ჩემი ხსენებით ყურადღების გადატანა უნდათ. კითხვაზე –  რა [ნივთიერება] იყო გამოყენებული? – პასუხი უნდა გასცენ“, – განუცხადა „ნეტგაზეთს“ შოთა უტიაშვილმა.

დღეს, 5 დეკემბერს, ირაკლი კობახიძემ განაცხადა, რომ BBC-ის ჟურნალისტურ გამოძიებასთან დაკავშირებულ ამბავში თეორიულად შეიძლება ვანო მერაბიშვილისა და შოთა უტიაშვილის პასუხისმგებლობა დადგეს.