12 წლის ანას გარდაცვალების საქმეზე მოსამართლემ გაიზიარა პროკურატურის მოთხოვნა და დაკავებული სამხარაულის ექსპერტი 2 500 ლარიანი გირაოს სანაცვლოდ გაათავისუფლა.
აღკვეთ ღონისძიებაზე მსჯელობა სასამართლომ რამდენიმე წუთის წინ დაასრულა.
სამხარაულის ექსპერტის წინააღმდეგ გამოძიება სამსახურებრივი გულგრილობის მუხლით, სისხლის სამართლის კოდექსის 342-ე მუხლის პირველი ნაწილით არის დაწყებული. პროცესის დაწყებამდე რამდენიმე საათით ადრე კი დიღომში გარდაცვლილი გოგოს დედა უფლებადამცველთან ერთად პროკურატურაში დაიბარეს. გარდაცვლილი გოგონას ოჯახი და უფლებადამცველი ექსპერტის პატიმრობაში დატოვებას ითხოვდა.
ანი იანუშაიტიტეს დედა ამბობს, რომ მთელი ამ დროის განმავლობაში დავით გრიგოლია მტკიცებულებების განადგურებას ცდილობდა, რადგან ბიოლოგიური ექსპერტიზა თვენახევრის შემდეგ ჩატარდა.
“იმაზე იყო აპელირება, რომ მას ჰყავს 4 შვილი და ამ 4 შვილს ჭამა უნდა, თუმცა სასექციო მაგიდაზე 12 წლის ბავშვი, რომ ეწვინა მაშინაც უნდა ეფიქრა, რომ ეს ის ბავშვია, ამ ბავშვის მკვლელი, რომ ვიპოვო მეტად ფრთხილი და მონდომებული უნდა ვიყო და მეტად სენსიტიური უნდა ყოფილიყო…დაკარგა და შემდეგში ვიტყვი რაც დაკარგა, დააობა და სადაც შეეძლო არ აიღო და ჩათვალა, რომ არ ევალებოდა. ” – ამბობს 12 წლის ანის დედა.
შეგახსენებთ, რომ “უფლებები საქართველომ” 5 ივლისს განაცხადა, რომ 12 წლის გოგოს საქმეში მნიშვნელოვანი მტკიცებულებები დაზიანებული იყო, კერძოდ, საკვლევი მასალების შენახვის წესის დარღვევის შედეგად, გოგონას გვამიდან აღებული ნიმუშები დაობდა.
“უფლებები საქართველოს” იურისტები მიიჩნევენ, რომ ჩადენილია მტკიცებულებათა განადგურებისკენ მიმართული დანაშაული და საჭიროა მინიმუმ ერთი ექსპერტის მიმართ ბრალის წარდგენა, რასაც საგამოძიებო უწყება დაუსაბუთებლად აჭიანურებს.
17 მარტს დიდ დიღომში, პეტრიწის ქუჩაზე 12 წლის ანა იანუშაიტიტე გარდაცვლილი იპოვეს. ოჯახი აცხადებს, რომ გოგო მოკლეს, რადგან მას სხეულზე დაზიანებები ჰქონდა.
კომენტარები