ანი დვალიშვილი
გადაწყვეტილება მიღებულია – ზამთრის პერიოდში, კონკრეტულად კი, 1-ელი დეკემბრიდან 1-ელ მარტამდე, მოცურების საწინააღმდეგო ჯაჭვებით აღჭურვა სავალდებულო გახდება. თუმცა, ეს მხოლოდ გზის გარკვეულ მონაკვეთებს შეეხება და ვინც ამ წესს დაარღვევს, 100 ლარით დაჯარიმდება და ამასთან ერთად, მართვის მოწმობაზე 5 ქულაც ჩამოეჭრება. კანონპროექტი პარლამენტში უკვე შეტანილია და იმის მიუხედავად, რომ დეპუტატები ამბობენ, განვიხილავთ და შესაძლოა მივიღოთო, კანონს აუცილებლად „დააჩაქუჩებენ“. რატომ? იმიტომ, რომ მოცურების საწინააღმდეგო ჯაჭვები დიდი ოდენობით სწორედ ერთ-ერთმა დეპუტატმა შემოიტანა და ახლა მათი რეალიზაციაა საჭირო. ჯაჭვები კი ყველას დასჭირდება და ახლავე აგიხსნით რატომ – მათი გამოყენება,კანონის მიხედვით, უღელტეხილების გადავლისას იქნება საჭირო და თავად განსაჯეთ, აღმოსავლეთ საქართველოდან დასავლეთში ყოველდღიურად რამდენი მანქანა წავა და რამდენია ისეთი, ვინც ამ პერიოდში, ერთხელ მაინც გაემგზავრება აღმოსავლეთიდან დასავლეთისკენ. თუნდაც ახალი წლის დღეები აიღეთ, ბევრი ხვდება სოფლად და ჯაჭვების ქონა ყველასთვის სავალდებულო გახდება, იმის მიუხედავად, იქნება თუ არა გზაზე თოვლი – კანონში პირდაპირ ასე ჩაიწერება, 1-ელი დეკემბრიდან, 1-ელი მარტის ჩათვლით. ჯაჭვების ფასი (წყვილის) 100 ლარიდან დაიწყება და საბოლოო ჯამში, რა თანხებზე მიდის საუბარი, თავად განსაჯეთ.
როგორც ვაანონსებდით, ეროვნული ვალუტა გასულ კვირაში 2.70 ნიშნულზე გამყარდა და ახლა, ეროვნული ბანკი ყველაფერს იზამს იმისთვის, რომ ეს ნიშნული, არამარტო ნოემბერში, არამედ დეკემბრის შუა რიცხვებამდეც შეინარჩუნოს, მერე საახალწლო სამზადისი შეეშველება, მერე კი… პირველ კვარტალში მოლოდინები მუდმივად არის ხოლმე. ჰო, ჩვენი მონაცემებით, ლარის სიმყარისთვის, ეროვნულ ბანკს 100 მილიონი დოლარი აქვს გადადებულ-გამზადებული, მაგრამ მეორე საკითხია, რამდენად მოახერხებს ამ თანხის გაყიდვას ბირჟაზე, რადგან, როცა ბოლოს დოლარი გამოიტანა გასაყიდად, ერთი მესამედი უკან წაიღო.
ვაღიაროთ, რომ ჩინეთთან უვიზო რეჟიმის შემოღების შემდეგ, ჩინელი მოქალაქეები მოგვიმრავლდნენ. შესაძლოა, ადრე ნაკლებ ყურადღებას ვაქცევდით და რუსების ფონზე არ ჩანდნენ, მაგრამ ახლა აშკარად ბევრნი არიან. იმდენი არიან, ვერც იმას რომ ვერ იტყვი, ღმერთმა ამვრავლოსო და ისიც გეცოდინებათ, განსაკუთრებით ძველ თბილისში, ბარ-რესტორნის მომხმარებელი უფრო მეტად უცხოელები არიან, ვიდრე ადგილობრივები. რესტორატორები ამბობენ, რომ ეს არამარტო თბილისის ცენტრალურ უბნებში, არამედ გარეუბნებშიც შეინიშნება, რაც შესაძლოა მათთვის კარგია, მაგრამ მთლიანად ქვეყნისთვის, სახარბიელო აშკარად არ უნდა იყოს. მეტიც, არაერთმა უცხოელმა დედაქალაქში კვების ობიექტი იქირავა და კლიენტებად თანამემამულეები ჰყავს. ამასთან ერთად, არსებობს უამრავი ჯგუფი, სადაც მაგალითად რუსეთის სხვადასხვა ქალაქებიდან ჩამოსული მოქალაქეები არიან გაერთიანებული, ერთმანეთს ეხმარებიან როგორც ბიზნესის დაწყებაში, ისე მის გამართვაში და არც მალავენ, რომ ურჩევნიათ საკუთარ თანამემამულეს ეწვიონ, ვიდრე ქართველებს. სავარაუდოდ, მალე იგივე მოხდება ჩინელებთან მიმართებით და ისიც ვაღიაროთ, რომ საქართველოს მოსახლეობის უდიდეს ნაწილს, რესტორნებში წასასვლელი ფული არ აქვს და თუ ვინმე ქეიფობს, ძირითადად ერთი და იგივე ხალხი.
კომენტარები