ავტომობილში ზეთის შესაცვლელად, შესაძლოა, მძღოლებს თბილისიდან გასვლა მოუწიოთ – ახალი რეგულაციები სერვისებს 3-ჯერ გააძვირებს, – ამის შესახებ ინფორმაციას BPN ავრცელებს.
მარტივად ამტვერებადი და აალებადი მასალების, მეორადი ნაწილების, მეორადი საბურავებისა და ჯართის განთავსება/რეალიზაციის წესების მოსალოდნელი გამკაცრების ფონზე, თბილისის ტერიტორიაზე ავტოსერვისების კომპანიებს აფრთხილებენ. თბილისის მუნიციპალური ინსპექციისგან, იმასთან დაკავშირებით, რომ არსებულ მისამართებზე ფუნქციონირების გაგრძელებას 2026 წლის 1-ლი იანვრიდან ვეღარ შეძლებენ.
ეს ნიშნავს იმას, რომ მათ მოუწევთ ქალაქგარეთ შეიძინონ მიწა, ან იქირაონ, ააშენონ ბოქსები თავიდან და ცხადია, მომსახურებაც გაძვირდება, არც კონკურენცია იქნება, რადგან, ყველა ვერ შესძლებს ახალი თანხის ჩადებას ბიზნესში და საქმიანობის ქალაქგარეთ გადატანად.
ერთ-ერთი ავტო სერვისის წარმომადგენელი BPN-თან, ამბობს:
„ძალიან დიდ პრობლემებს გამოიწვევს. თბილისის მასშტაბით, შემოგარენში მაქსიმუმ 3 მიმართულებაა, საითაც შეგიძლია გადახვიდე. ესაა სამრეწველო ზონები გლდანის შემოვლით გზაზე, ორხევში ან წეროვნისკენ. საუბარია ძირითად მიმართულებებზე. ცვლილება პრობლემას გამოიწვევს საცობების მხრივ. სწორედ ეს იქნება ყველაზე დიდი კატასტროფა. წარმოიდგინეთ, ზეთის შესაცვლელად შესაძლოა, თბილისიდან მოგიწიოს გასვლა. ამ ძირითად მიმართულებებზე მოუწევს სიარული ყველას სერვისების მისაღებად. დროც ხომ უნდა დაკარგო? თბილისის მასშტაბით ზეთს ვერსად ვეღარ შეცვლი, მეორად საბურავს ვეღარ დააყენებ აკრძალულ ზონებში. მხოლოდ დედაქალაქში არსებულ სამრეწველო ზონებში იქნება ეს ყველაფერი ხელმისაწვდომი”
კომენტარები