„ვფიქრობ, ამას ელოდება გიორგი გახარია და შესაძლოა, ის გახდეს ოპოზიციის ლიდერი“ – სოსო ცინცაძე

ლევან ჯავახიშვილი

„ალიას“ ესაუბრება ექსპერტი, სოსო ცინცაძე.

– ბატონო სოსო, რამდენად შესაძლებელია, რომ პრეზიდენტი სალომე ზურაბიშვილი, დასავლეთის მხრდაჭერით, ოპოზიციის საერთო ლიდერი გახდეს?

– სიმართლე გითხრა, მე გიორგი გახარიას უფრო მოვიაზრებდი ოპოზიციის ლიდერად. ვფიქრობდი, რომ თავის დროს ელოდება და იმიტომ პასიურობდა ამდენ ხანს. თუმცა, ფაქტია, ერთადერთი პოლიტიკოსი  საქართველოში, რომლის რეიტინგიც იზრდება, ეს პრეზიდენტია. თან, მსოფლიოში ერთადერთი ოპოზიციონერი პრეზიდენტია და  მთელი ცივილიზებული სამყაროს სიმპათია მის მხარეს არის. თავად სალომე ზურაბიშვილის გადასაწყვეტია, გახდება თუ არა ლიდერი. საზოგადოების გარკვეული ნაწილის მხარდაჭერა აქვს, თუმცა, ხალხში ჯერ დიდად პოპულარული არ არის,  თუ არ ჩავთვლით ინტელიგენციას, მისი მხარდაჭერა  ნამდვილად აქვს. დასავლეთის მხარდაჭერა  აქვს, თან ყოველდღიურად მზარდი. ახლა მარტო განცხადებებიდან, საქმეზე უნდა გადავიდეს. ნიკა გვარამია რომ შეიწყალოს, ეს იქნება ბომბი. დასავლეთიც დაუფასებს და  ოპოზიციაც. მეტიც, მე ველოდები, რომ შეიწყალებს.  თბილისში ჩამოსულმა ევროპარლამენტარმა,  ვიოლა ფონ კრამონმა განაცხადა კიდეც, რომ პრეზიდენტმა უნდა შეიწყალოს გვარამია, სხვა გამოსავალი არ არის. ეს მარტო ფონ კრამონის აზრი არ არის, ეს ევროპის პოლიტიკური წრეების აზრია. ფაქტობრივად, უკვე მოითხოვენ მისგან გვარამიას შეწყალებას. სალომეს პარლამენტში გამოსვლა ხომ ნახე? ორად გაყო თავისი გამოსვლა. 2021 წლამდე, ვიდრე ბიძინა ივანიშვილი პოლიტიკიდან  წავიდოდა, საქართველოს სწორი საგარეო, ევროპული კურსი ჰქონდა და მერე გადაუხვია ამ კურსს და პრორუსული გახდაო – დაარტყა „ქართულ ოცნებას“. მე არ მჯერა, რომ  „ქართული ოცნება“ ივანიშვილის გარეშე რაიმეს აკეთებს, მაგრამ  ფაქტია, რაც ზურაბიშვილმა თქვა, მართლა  ეგრე იყო. იმ პერიოდში  ევროკავშირთან ვიზალიბერალიზაცია გავაფორმეთ, ყოვლისმომცველ სავაჭრო ხელშეკრულებას მოვაწერეთ ხელი, 2018 წელს კონსტიტუციაში ჩავწერეთ, რომ საქართველო აუცილებლად გახდება ევროკავშირის და ნატო–ს წევრი. ეს ყველაფერი მაშინ  მოხდა,  როდესაც ბიძინა ივანიშვილი იყო „ქართული ოცნების“ თავმჯდომარე.  გაისად გასდის სალომე ზურაბიშვილს საპრეზიდენტო ვადა, ვნახოთ, რა მოხდება. ერთხელ გვახსოვს საგარეო საქმეთა მინისტრის პოსტიდან გადამდგარი ზურაბიშვილი ხალხში გავიდა და დიდი რეიტინგი ჰქონდა მაშინ. თუ ახლაც გავიდა ხალხში,  დადგა ხალხთან, მაშინ მის ლიდერობას წინ აღარაფერი უნდა დაუდგეს. თუ ეს პრეზიდენტის რანგში გააკეთა, მეტი ფასი დაედება, ვიდრე  უფლებამოსილება გასულ ექს–პრეზიდენტის  ანალოგიურ ქმედებას. ასევე, ოპოზიციის ლიდერ სალომე ზურაბიშვილს  მოუწევს დაარტყას ბიძინა ივანიშვილს, კონკრეტულ დანაშაულებებში ამხილოს. კი, რაც თქვა, ბიძინაზე პარლამენტში, იმას უკან ვერ წაიღებს, მაგრამ ის უნდა თქვას, რომ რასაც „ქართული ოცნება“ აკეთებს 2021 წლის მერე, რაც ქვეყანას ავნო, ამის უკან ივანიშვილი დგას, რომ ის არის ქვეყნის არაფორმალური მმართველი. შესაბამისად, მძიმე ეკონომიკური და სოციალური მდგომარეობა, არნახული ემიგრაცია, ხელისუფლების მორჩილი სასამართლო და მთლიანად მართლმსაჯულება, ეს და სხვა ყველაფერი ივანიშვილისა და „ქართული ოცნების“ ერთობლივი მმართველობის შედეგია. ბოლოს ვიტყვი, რომ გიორგი გახარიას  მაინც არ გამოვრიცხავ ოპოზიციის  ლიდერად. ახლა არ აქტიურობს, მაგრამ მე მგონია, ამას თავისი მიზეზი აქვს. გახარია იყო ჩინოვნიკი, ფრთხილობს, თუ გააქტიურდა, მისი ძველი საქმიანობიდან, რაიმე არ ამოუგდონ ისეთი, რომლითაც მის დისკრედიტაციას მოახდენენ. მეტიც, სისხლის სამართლის საქმე არ აღუძრან. დანაშაულიც  რომ არ ჰქონდეს ჩადენილი, შუთითხნიან. გაისად, გაზაფხულზე თუ გააქტიურდა, მაშინ ხელისუფლებას ნაკლები დრო,  ნაკლები  საშულებები ექნება გახარიასთვის პრობლემების შესაქმნელად. მე ვფიქრობ, ამ დროს ელოდება გიორგი გახარია.