ხობში, პოლიციელებს შორის მომხდარი დაპირისპირებისას მოკლული სამართალდამცველის, პაპუნა ლოლუას ახლობლები სავარაუდო დამნაშავეზე “ტვ მთავართან” საუბრობენ და ამბობენ:
“ვინც დააბრუნა სამსახურში, ის არის დასაჭერი და მოსახსნელი. მოხსნილი იყო 4-ჯერ სამსახურიდან მკვლელი. მოფიქრებული მკვლელობაა..”
რა გახდა მკვლელობის მოტივი ოფიციალურად უცნობია.
მოკლულის ოჯახში ამბობენ, რომ ეჭვმიტანილს პათოლოგიური სიმთვრალე ჰქონდა და დარღვევებზე მას შენიშვნებიც ჰქონდა მიღებული. დაღუპულის ახლობლები ამბობენ, რომ მან მას მერეც გაგრძელა სროლა, როცა პირველი ტყვიის მერე მამაკაცი წაიქცა და წაქცეულსაც ესროდა.
პოლიციელმა პოლიციელი სამორიგეო ოთახში 14 ტყვიით ჩაცხრილა. შემთხვევა გუშინ, გვიან ღამით მოხდა. შემთხვევის ადგილზე ამ დრომდე მუშაობენ ექსპერტ კრიმინალისტები.
“არ იყო კონფლიქტური პაპუნა. მშვიდი, ძალიან გაწონასწორებული იყო…ავტომატურზე იყო და ეტყობა ვერ დაიჭირა და შეიძლება მთლად ასე არ უნდოდა, ან შესაშინებლად უნდოდა “,- ამბობს მოკლული პოლიციელის, პაპუნა ლოლუას ახლობელი.
მკვლელობას ერთი თვითმხილველი ჰყავს, რადგან სხვა პოლიციელები გუშინ მარტვილში, მეუფე სტეფანეს დასაცავად წაიყვანეს. შსს-მ გამოძიება 108-ე მუხლით დაიწყო, რაც განზრახ მკვლელობას გულისხმობს.
დაკავებული ფოთის იზოლატორშია მოთავსებული.
კომენტარები