ბრიტანული ჟურნალის The Spectator აქვეყნებს სტატიას სათაურით “პუტინის “ქორები” ერთმანეთს დაერივნენ“, სადაც საუბარია რუსეთის პრეზიდენტის მხარდამჭერებს შორის გაჩენილი უთანხმოება, უკრაინასთან ომის ფონზე.
“ვლადიმერ პუტინს მთავარი საფრთხე ლიბერალებისაგან კი არ ემუქრება (რომლებიც მან ძირითადად უკვე ციხეებში ჩაყარა და საზღვარგარეთ გააძევა), არამედ სულ უფრო და უფრო უკმაყოფილო ნაციონალისტებისაგან,” – წერს გამოცემა.
“მათგან ერთ-ერთ ყველაზე ცნობილ პიროვნებას წარმოადგენს იგორ გირკინი, სამხედრო ფსევდონიმით “სტრელკოვი”. სწორედ ის იყო დონბასში სეპარატისტული ანტიუკრაინული გამოსვლების ინციატორი 2014 წელს. იგორ გირკინი მონარქისტი და ნაციონალისტია, ამას წინათ ჰააგის სასამართლომ იგი დამნაშავედ აღიარა სამოქალაქო ავიალაინერ MH17-ის ჩამოგდების გამო. უკრაინაში შეჭრის შემდეგ იგორ გირკინის კომენტარები მოულოდნელად სატირული და კრიტიკული გახდა – ვლადიმერ პუტინს იგი უწოდებს “უნიკალურ სტრატეგიულ უპირატესობას”, თავდაცვის მინისტრს სერგეი შოიგუს – “ფანერის მარშალს”, “სულელს”, “ქურდს” და “ავაზაკს”. მუდმივად “ამკობს” მთავრობის სხვა წევრებსაც.
ოქტომბერში იგორ გირკინმა განაცხადა, რომ მან გადაწყვიტა მონაწილეობა მიიღოს საომარ მოქმედებებში, მაგრამ მოგვიანებით იგი ისევ მოსკოვში გამოჩნდა. როგორც ჩანს, ხელისუფლებამ ჩათვალა, რომ მისი ადგილი ფრონტზე არ არის, სადაც გირკინის ვარსკვლავი ან გაბრწყინდებოდა, ან შეიძლება უკრაინელებს ტყვედაც ჩაეგდოთ, რითაც დიდი პოლიტიკური კონფუზი მოხდებოდა.
ის, რომ გირკინი საშიშ პიროვნებაა, აშკარაა იმითაც, რომ ტელეწამყვანი ვლადიმერ სოლოვიოვი, მას “ფსევდოპატრიოტს” უწოდებს – “იგი ომში წავიდა, მაგრამ ჩაისვარა და უკან დაბრუნდა”, – თქვა მან ბოლო კვირის გადაცემაში და გირკინს ურჩია, – “იქნებ ვაგნერის ბიჭებთან წახვიდე, ბრძოლას მიგაჩვევენო”
იგორ გირკინის პასუხს არ დაუგვიანია: მან ტელეწამყვანს მშიშარა და მატყუარა არსება უწოდა, ღია დებატები შესთავაზა და განაცხადა: “თუ იგი, სიღარიბის გამო, დებატების ორგანიზებას ვერ შეძლებს, მე მზად ვარ, შესაბამისი პლატფორმა შევთავაზო”. ეს “წელს ქვემოთ” დარტყმა იყო, ყველამ იცის, რომ სოლოვიოვი, რომელიც დასავლეთში მყოფ რუს “სპეკულიანტებს” და “კორუფციონერებს” ლანძღავს, თვითონ არის მილიონერი და ფლობდა ორ ვილას კომოს ტბის ნაპირზე იტალიაში და ძალიან გაბრაზდა, როცა იტალიის პოლიციამ ამ შენობების კონფისკაცია მოახდინა.
ნათელი ხდება, რომ რუსეთში არსებობს დისიდენტების ახალი სახის აჯანყების შესაძლებლობა – “ქორი” ნაციონალისტებისა, რომელთა აღმასვლა დასავლეთს ნამდვილად არ სურს, მაგრამ რომლებიც, იმავდროულად, ვლადიმერ პუტინისათვის პოლიტიკურ გამოწვევას წარმოადგენენ.” – წერს გამოცემა.
კომენტარები