ვინ არის სულხან ზუმბურიძე, რომლის კომპანიამ სახელმწიფო შესყიდვებიდან 28 მილიონი მიიღო – “საერთაშორისო გამჭვირვალობა – საქართველოს” თანახმად, ზუმბურიძეს 2010 წლის იანვრიდან 2018 წლის ოქტომბრამდე, საქართველოში ერთ-ერთი ყველაზე მაღალანაზღაურებადი სს „საქართველოს სახელმწიფო ელექტროსისტემის” დირექტორის/მმართველთა საბჭოს თავმჯდომარის თანამდებობა ეკავა. ამავე სახელმწიფო კომპანიის მმართველთა საბჭოს წევრი იყო მამუკა პაპუაშვილი.
თანამდებობებიდან წასვლის შემდეგ კი ამ პირებმა და მათმა კუთვნილმა კომპანიებმა სახელმწიფო შესყიდვებიდან 28 მილიონ ლარზე მეტი და 15 ჰექტარი მიწის ნაკვეთები მიიღეს 49 წლით, მათზე შენობა-ნაგებობების განთავსების უფლებით.
სულხან ზუმბურიძე ვიდრე დაიწყებდა თავის კერძო ბიზნეს საქმიანობას, მანამდე იყო სახელმწიფო კომპანია სახელმწიფო ელექტროსისტემის დირექტორი და ამ კომპანიის საქმიანობის აუდიტორული საქმიანობის შესწავლის შემდეგ, სახელმწიფო აუდიტის სამსახურმა დაადგინა, რომ დაახლოებით, 75 მილიონზე არის ასული ზარალი. მან დაიწყო ბიზნესში უკვე ამ თანხების მოზიდვა სახელმწიფო ბიუჯეტიდან და დაახლოებით, მისმა კომპანიებმა 28 მილიონი ლარის ტენდერები მოიპოვა და მიიღო დაახლოებით, 15 ჰა-ზე მეტი მიწა სახელმწიფოსგან აღნაგობის უფლებით,“ – ამბობს ზვიად ქორიძე.
2019 წლიდან სულხან ზუმბურიძე შპს „პარვუს ჯგუფის” დირექტორი და 50% წილის მფლობელია, ხოლო დარჩენილ 50% წილს მამუკა პაპუაშვილი ფლობს. ეს კომპანია მცირე და საშუალო ჰესებს აშენებს და დაფუძნებიდან დღემდე მან სახელმწიფო შესყიდვებიდან მიიღო 27,984,905 ლარის შემოსავალი. მათ შორის 89% გამარტივებული და კონკურენტების დისკვალიფიკაციის შედეგად მოგებული შესყიდვებიდან.
დაფუძნებიდან 2 თვეში, ზუმბურიძისა და პაპუაშვილის კომპანიამ სააქციო საზოგადოება „საქართველოს ენერგეტიკის განვითარების ფონდის” მიერ გამოცხადებულ ტენდერში პრეტენდენტის მიერ შეთავაზებულ ფასზე 1 ლარით დაბალი ფასის შეთავაზებით გაიმარჯვა.
ყველაზე მსხვილი შესყიდვა, 10 მილიონამდე ლარის ხელშეკრულება, „პარვუს ჯგუფმა” დაფუძნებიდან 1 წელში, სამუშაოების შეზღუდულ ვადებში შეუფერხებლად ჩატარების არგუმენტაციით, გამარტივებული შესყიდვის წესით, სსიპ „საქართველოს ინოვაციებისა და ტექნოლოგიების სააგენტოს” დაფუძნებული ა(ა)იპისგან, „ოუფენ ნეტისგან” მიიღო (SMP200002889; CMR200092744) – ყოფილი მაღალჩინოსნების კომპანიამ ვალდებულად აიღო ოზურგეთში ოპტიკურბოჭკოვანი ინტერნეტის მიწოდების უზრუნველსაყოფად ინფრასტრუქტურის მოწყობა. აღსანიშნავია, რომ ზუმბურიძისა და პაპუაშვილის კომპანიამ თანხის ნახევარზე მეტი, „ოუფენ ნეტიდან” ავანსად ხელშეკრულების გაფორმებიდან 2 თვეში მიიღო. „პარვუს ჯგუფმა” ნაკისრი ვალდებულებების გადავადება 2-ჯერ ითხოვა, სამუშაოები 2020 წლის დეკემბრის ნაცვლად, 2021 წლის აპრილში დაასრულა, ვადაგადაცილების გამო კი პირგასამტეხლო, 77 ათას ლარამდე გადაიხადა.
ზუმბურიძის კიდევ ერთმა კომპანიამ, შპს „პარვუს ქონსთრაქშენმა”, რომლის 100% წილს შპს „პარვუს ჯგუფი” ფლობს, დაფუძნებიდან დღემდე, გადაუდებელი აუცილებლობის და სახელმწიფოებრივი/საზოგადოებრივი მნიშვნელობის ღონისძიების შემჭიდროებულ ვადებში ჩატარების არგუმენტაციით, უკონკურენტოდ, გამარტივებული შესყიდვების გზით, დუშეთის მუნიციპალიტეტისგან 366,684 ლარი მიიღო.
სულხან ზუმბურიძე შპს „ბლექ სი ენერჯის” სამეთვალყურეო საბჭოს თავმჯდომარეცაა, „სახელმწიფო ელექტროსისტემის” მმართველთა საბჭოს კიდევ ერთი ყოფილი წევრი, მამუკა პაპუაშვილი კი ამავე კომპანიის დირექტორთა საბჭოს წევრია. ამ შპს-ს 50% „კომპანია ბლექ სი გრუპი” ფლობს, რომელსაც დაფუძნებიდან დღემდე სახელმწიფო შესყიდვებიდან 530,923,480 ლარის შემოსავალი აქვს მიღებული, მათ შორის 51% უკონკურენტო ტენდერებიდან და გამარტივებული შესყიდვებიდან. „ბლექ სი გრუპის” ერთი-ერთი მეწილის, გიორგი კალანდაძის ბიზნესპარტნიორი კომპანია შპს „ძველ დედაქალაქში” არის ბექა ოდიშარია, „ქართული ოცნების” დეპუტატი საქართველოს პარლამენტში.
კომენტარები