ლიეტუვის პარლამენტმა პრემიერ-მინისტრის პოსტზე ინგა რუგინენე დაამტკიცა. მის არჩევას მხარი 78-მა დეპუტატმა დაუჭირა, 35 კი წინააღმდეგ წავიდა. რუგინენეს წარდგენას წინ მისი წინამორბედის, გინტაუტას პალუცკასის სკანდალური გადადგომა უძღოდა წინ. ყოფილმა პრემიერმა პოსტი კორუფციასთან კავშირის ბრალდების გამო დატოვა.
რაც შეეხება ლიეტუვას ახალ ლიდერს, ინგა რუგინენე სოციალურ დემოკრატიული პარტიის პოლიტიკურ ლიდერობამდე წლების განმავლობაში მშრომელთა გაერთიანებას ხელმძღვანელობდა. პალუცკასის გადადგომამდე ის მთავრობაში სოციალურ საკითხთა და დასაქმების მინისტრის პოზიციას იკავებდა. სხვა პოლიტიკოსებისაგან რუგინენეს მოლაპარაკებების წარმატებით წარმართვის მდიდარი გამოცდილება გამოარჩევს.
44 წლის რუგინენე ლიეტუვის ქალაქ ტრაკაიში დაიბადა და ვილნიუსში გაიზარდა. აღსანიშნავია, რომ მომავალი პრემიერ-მინისტრი საზაფხულო არდადეგებს უკრაინაში, კრამატორსკში ატარებდა. ანალიტიკოსების აზრით, ომში მყოფ ქვეყანასთან მისი კავშირი ორ ქვეყანას შორის ურთიერთობას კიდევ უფრო გააღრმავებს.
რუგინენეს მრავალმხრივი განათლება აქვს მიღებული. მან 2005 წელს ვილნიუსის უნივერსიტეტში საზოგადოებრივი ჯანმრთელობის მაგისტრის ხარისხი მიიღო. პრემიერ-მინისტრი ფლობს მაგისტრის ხარისხს შრომით სამართალშიც. 2005-2010 წლებში ის საზოგადოებრივი ჯანმრთელობის სპეციალისტად მუშაობდა. 2012 წელს კი ლიეტუვას უდიდესი პროფკავშირის ხელმძღვანელი გახდა. ის აღნიშნულ თანამდებობას 2024 წლის ნოემბრამდე იკავებდა. გასულ წლის მიწურულს რუგინენე პარლამენტის წევრი გახდა და დეკემბერშივე სოციალურ საკითხთა და დასაქმების მინისტრის პორტფელი ჩაიბარა.(ბიემჯი)
კომენტარები