სახელმწიფო უსაფრთხოების სამსახურის მიერ ქავათარაძეზე სპეცოპერაციისას დაკავებული პირი რუსეთის მოქალაქე, ვასამბეგ ბოკოვია. ინფორმაციას „რუსთავი2“ ავრცელებს.
სპეცოპერაციის დროს დაკავებული ჩეჩენი ეროვნების მამაკაცი, გავრცელებული ინფორმაციით, პანკისის ხეობაში ქავთარაშვილების და მუთოშვილების დაპირისპირებულ გვარებს შორის, შერიგების პროცესშიც მონაწილეობდა.
ინფორმაცია „პრაიმტაიმს“ პანკისის ხეობის ერთ-ერთი უხუცესი, ხასო ხანგოშვილი უდასტურებს:
„დაახლოებით თვენახევარია, რაც გავიცანით. ახლო ურთიერთობა არ მქონია, მაგრამ მისი საქმიანობით დავინტერესდი და კითხვები დავუსვი.
ამიხსნა, რომ ბიზნესმენია. საეჭვო არაფერი შემინიშნავს, არც ზარები, არც ვინმესთან კონტაქტი.
ჩვენთან დაპირისპირებულ გვარებს შორის, შერიგების პროცესი მიმდინარეობს და იქაც მონაწილეობდა.
როგორც ვიცი, მხარეებთან,თურქეთში მცხოვრები საერთო მეგობარი აკავშირებს. სამართალდამცავები, ზრდილობიანად მოვიდნენ, თავიანთი საქმე გააკეთეს.
მკითხეს ასეთ კაცს თუ იცნობთო. ნამდვილად იყო ჩემს ოჯახში და ვუპასუხე კითქო“
დაკავებული ჩეჩენი მამაკაცის შერიგების პროცესში მონაწილეობას უარყოფს, ერთ- ერთი დაპირისპირებული გვარის, ქავთარაშვილების წარმომადგენელი, მერაბ ქავთარაშვილი.
„სოციალური ქსელით გავიგე, რომ დააკავეს მამაკაცი, რომელიც იმყოფებოდა პანკისის ხეობაში. საერთოდ, არ ვიცით, ვინ არის.
თვალით არ გვინახავს, არც შერიგების პროცესში და არც შემდეგ“, – თქვა ქავთარაშვილმა.
„პრაიმტაიმი“ პანკისის ხეობის უხუცესთა კავშირის თავმჯდომარეს, ზელიმხან წუწაშვილსაც დაუკავშირდა.
რამდენიმე თვის წინ, წუწაშვილმა, დაპირისპირებული გვარების შესარიგებლად, ჩეჩნეთიდან 15-კაციანი დელეგაციის ჩამოყვანა უზრუნველყო.
„არ ვიცი, ვინ არის. მხოლოდ ის გავიგე, რომ ახმედი ჰქვია. ჩვენ ჩეჩნეთიდან, სულ სხვა, მაჰმადიანურ სამყაროში მეტად პატივსაცემი ხალხი ჩამოვიყვანეთ.
ისინი, ყველგან, შერიგებებში მონაწილეობენ და უაღრესად მორწმუნე ხალხია. ამ მამაკაცის შესახებ, არაფერი ვიცი“
დაკავებული მამაკაცი, რუსეთის მოქალაქეა.
„კურიერის“ ინფორმაციით დაკავებული, რომელიც აჰმედის სახელითაა ცნობილი, საკუთარ ვინაობას და საქმიანობას მალავდა.
დაკავებულის უფლებადამცველი ნინო მიქატაძე არ ადასტურებს გავრცელებულ ინფორმაციას იმასთან დაკავშირებით, რომ ვასამბეგ ბოკოვის დაკავება სხვა ქვეყნის მოთხოვნით მოხდა:
„ვიცავ ვასამბეგ ბოკოვის ინტერესებს, რომელსაც მიმდინარე წლის 14 ივნისს წარედგინა ბრალდება სისხლის სამართლის 362-ე მუხლის პირველი ნაწილით გათვალისწინებული შესაძლო დანაშაულის ჩადენისთვის, რაც გულისხმობს ყალბი ოფიციალური დოკუმენტის შეძენა-შენახვას მისი გამოყენების მიზნით და, ასევე, ამ დოკუმენტის გამოყენებას. ბრალდების მხარემ აღკვეთის ღონისძიების შეფარდების შესახებ სასამართლოს უკვე მიმართა და ბრალდებულის პირველი სასამართლო სხდომა დღეს გაიმართება. ბრალდების მიერ მოთხოვნილი აღკვეთის ღონისძიების სახე გახლავთ დაპატიმრება”
კომენტარები