რამდენიმე წუთის წინ, შსს-მ გაავრცელა ინფორმაცია, ბადრი ესებუას შესახებ და დაადასტურა, რომ ნამდვილად ისაა ბანკზე თავდასხმისთვის ძებნილი, მან ისიც თქვა, რომ ბადრი ესებუას ტერორისტული მიზნებისთვის ჰყავდა მძევლები აყვანილი.
განცხადების შემდეგ, შს მინისტრის მოადგილემ, რამდენიმე კითხვას უპასუხა.
მინისტრის მოადგილეს ჰკითხეს, მართალია, თუ არა, რომ ესებუა იპოვნეს ერთხელ უკვე და გაექცათ და აქვთ თუ არა ინფორმაცია ესებუას ბოლო ლოკაციის შესახებ.
“დავაკავეთ და გაგვექცა? – ეს არის მიზანმიმართულად, უტიფრად სიცრუის ტირაჟირება, რომ თითქოს ბოროტმოქმედი დავაკავეთ და გაგვექცა, ტყუილია ეს ყველაფერი, სიმართლეს არ შეესაბამება. ბოლო ლოკაციაში რას გულისხმობთ? ადგილსამყოფელის შესახებ, ჯერ დაზუსტებული ინფორმაცია არ გვაქვს.”
შეიძლება თუ არა, ესებუას ჰყავდეს თანამზრახველები, ამ კითხვას შს მინისტრის მოადგილე, ასე პასუხობს:
“თუ შევაგროვებთ მტკიცებულებებს, რომ კონკრეტული პირი თანამონაწილე იყო, ეხმარებოდა – ვიმსჯელებთ ამ ადამიანებზე და ჩვენი რეაქცია გვექნება.”
და ბოლოს, მინისტრის მოადგილეს ჰკითხეს, როგორ გაჟონა ინფორმაციამ მედიაში და ნიშნავს თუ არა ეს, რომ სისტემა ჩამოშლილია?
“რომელი სისტემაა ჩამოშლილი? ვინ ამბობს რომ სისტემა ჩამოშლილია? ფლობთ დაზუსტებულ ინფორმაციას, რომ ამ ინფორმაციამ პოლიციიდან გაჟონა? – გაქვთ ამაზე ინფორმაცია, თუ პროვოკაციულად მისვამთ კითხვას? – აბსურდია. მაშინ, როდესაც მედიასაშუალებებით გავრცელდა ვიდეოჩანაწერები, სადაც კარგად ჩანს ფიზიკური აღნაგობა ამ ადამიანის და ისმის მისი ხმა, ჩვენ არ გამოვრიცხავთ, რომ ვიღაცამ, ნებისმიერმა მოქალაქემ იგი ამოიცნო და ამის შესახებ ინფორმაცია მედიასაშუალებებს მიაწოდა. არც იმას გამოვრიცხავთ, რომ სამძებრო ღონისძიებების დროს რაღაცა ინფორმაცია გაიჟონა და აქედან გახდა ეს ინფორმაცია მედიასაშუალებისთვის ცნობილი, მაგრამ ეს არის ვარაუდი.”
ამ პასუხის შემდეგ, მინისტრის მოადგილემ ბრიფინგის დარბაზი დატოვა.
როგორც ვნახეთ, ამ დროისათვის, არათუ ესებუას ადგილსამყოფელი არ არის დადგენილი, იმაზეც არ გვაქვს პასუხი, დატოვა თუ არა მან ქვეყანა. მინისტრის მოადგილეს, მხოლოდ ვარაუდი აქვს, როგორ მოხვდა გასაიდუმლოებული ინფორმაცია მედიის ხელში და მართალია, ჟურნალისტებს პროვოკატორებს გვეძახის, მაგრამ თავადვე ამბობს რამდენიმე წამში, რომ შეიძლებოდა ინფორმაციას მართლაც პოლიციიდან გაეჟონა.
ჩამოქცეულია თუ არა სისტემა, ამის პასუხი შს მინიტრმა ჩემზე უკეთ იცის, მაგრამ – თუ მოქალაქემ იცნო თავდამსხმელი და შსს-ს კი არა, მედიას შეატყობინა, ეს ვერ იქნება შსს-ს მიმართ ნდობის გამომხატველი ფაქტი და თავის დასამშვიდებლადაც ვერ გამოდგება, ბატონებო.
კომენტარები