“ქართული მარშის” წევრი, გიორგი გაბედავა სოციალურ ქსელში ვიდეოს აქვეყნებს.
ვიდეოში იგი ახალგაზრდა მამაკაცთან ერთადაა პოლიციის განყოფილების წინ (აღმაშენებლის ქუჩაზე), ახალგაზრდა ამტკიცებს, რომ იგი ჯარისკაცია და პოლიციას, რომელმაც გააჩერა, არ მისცა თანხმობა ფოტოს გადაღებაზე, რის გამოც, მისივე თქმით, იგი განყოფილებაში გადაიყვანეს, სადაც ხელები გადაუგრიხეს და სახეში გაარტყეს, შემდეგ კი, მანქანით წაიყვანეს და გვერდებში ურტყეს.
გიორგი გაბედავა და ახალგაზრდა მამაკაცი, ჯემალ კობალაძე ერთად შედიან პოლიციის განყოფილებაში, სადაც ახალგაზრდა ხელს ადებს ერთ-ერთ თანამშრომელს და ამბობს, რომ მან გადაუგრიხა ხელი და სახეში გაარტყა. პოლიციის განყოფილების უფროსი კი ამტკიცებს, რომ მსგავსი არაფერი მომხდარა, უბრალოდ “ხელი მოჰკიდა/ხელი გადაჰხვია” და სულ ეს იყო. იგი ამბობს, რომ განყოფილებაში კამერებია და ვიდეოს გენ. ინსპექციას მიაწოდებს. კითხვაზე, ჰქონდათ, თუ არა სამხრე კამერები პოლიციელებს, იგი ამბობს, რომ სამწუხაროდ, არა. განყოფილების უფროსი ამბობს, რომ ახალგაზრდას იდენტიფიცირება ვერ მოხდა, რადგან, მან პოლიციელებს არ უთხრა ვინაობა, ამიტომ გადაიყვანეს განყოფილებაში, სადაც მისი ვინაობა დაადგინეს და გაუშვეს. იგი ამბობს იმასაც, რომ ახალგაზრდა ზრდილობით სულაც არ გამოირჩეოდა. თუმცა, ვიდეოში, რომელიც გიორგი გაბედავამ გადაიღო, ჯემალ კობალაძე არც თუ ისეთი სითამამით გამოირჩევა, მით უფრო, რომ მარტო აღარაა და არც უზრდელობს.
“ალია” გიორგი გაბედავას დაუკავშირდა, რომელიც გვიყვება, რომ მაღაზიაში ჩავიდა აღმაშენებლის ქუჩაზე, რა დროსაც, ახალგაზრდა, რომელიც ძალიან ჰგავდა შეშინებულს, მასთან მივიდა და დახმარება სთხოვა. გაბედავას თქმით, იგი დაუკავშირდა გენ. ინსპექციას და დიდი იმედი აქვს, მოკვლევა დაიწყება.
კომენტარები