არის თუ არა კორონავირუსი შიდსის, ტუბერკულოზის, მალარიისა და ჰეპატიტის ვირუსებზე უფრო მკვლელი დაავადება? გაიზრდება თუ არა ინფიცირებულთა რაოდენობა 2 მილიონამდე?
„2020NEWS“-თან საუბრისას ეპიდემიოლოგმა, მაია ზალდასტანიშვილმა განაცხადა:
„ვიდრე კორონავირუსი იარსებებდა, იყო შიდსის ვირუსი, თუმცა ის არ იყო ასეთი გადამდები. ბატონ ამირანს, დიდი პატივისცემის მიუხედავად, ვერ დავეთანხმები იმაში, რომ კორონავირუსი და შიდსის ინფექცია ერთნაირი მკვლელები არიან, თუმცა გარდაცვალების მატებას რაც შეეხება, ჯერჯერობით, არ არსებობს კორონავირუსის ვაქცინა და თუ ეს წლების განმავლობაში ასე გაგრძელდა, მაშინ შესაბამისად, ხანგრძლივი ლეტალობა გველის წინ.
რასაც მე ვუყურებ კორონავირუსით ინფიცირების უმეტესი შემთხვევა მსუბუქად მიმდინარეობს ან საშუალო სიმძიმით, თუმცა, გარკვეულწილად, არსებობს გართულებებიც, რის ასაცილებლადაც პაციენტების ჰოსპიტალიზაცია ხდება.
მე ვერ ვუწოდებ კორონავირუსს 100%-ით მკვლელ ვირუსს, რადგან მგონია, რომ ყველაფერი კარგად იქნება, როდესაც ვაქცინა შეიქმნება.
იმ პაციენტების დაინფიცiრება, რომელთაც ტუბერკულოზი აქვთ, ნამდვილად არასასიამოვნო იქნება, რადგან შესაძლოა ლეტალურ შედეგებამდე მივიდეთ. რაც შეეხება შიდსიც დაინფიცირებულ პაციენტებს, ჩვენ გვქონია შემთხვევა, როდესაც შიდსიანი ადამიანი დაინფიცირდა კორონავირუსით, მაგრამ მისი მდგომარეობა არ დამძიმებულა, პირიქით ყველაფერი კარგად დასრულდა და მალევე გამოჯანმრთელდა.
კორონავირუსის რაოდენობის მატება დაკავშირებულია იმასთან, რომ კეთდება ძალიან ხშირი და ფართომასშტაბიანი ტესტირება, ვისაც აქვს მცირე კლინიკური სიმპტომები, მაგალითად სიცხე ან ყელის ტკიბილი, მათ უკეთდებათ უფასო ტესტირებები, აქედან გამომდინარე, იზრდება დარეგისტრირებული შემთხვევების რაოდენობაც. აქამდე თუ 300-400 შემთხვევას აცხადებდნენ, ეს იყო რეგისტრირებული შემთხვევების რაოდენობა და არა – არარეგისტრირებულისა. გაიზარდა მომართვიანობა და ამავდროულად ინფიცირებულთა რიცხვიც. თუ გვინდა, რომ თავი დავიცვათ ამ ვირუსისგან პირველი პრევენცია პირბადის გაკეთება და დისტანციის დაცვა იქნება“
ცნობისთვის, დღეს დაავადებათა კონტროლის ცენტრის დირექტორმა, ამირან გამყრელიძემ განაცხადა, რომ ეს ინფექცია „იქნება კიდეც უფრო დიდი მკვლელი, ვიდრე არის შიდსი, ტუბერკულოზი, მალარია, ჰეპატიტი – ეს ოთხი ყველაზე დიდი ინფექციური მკვლელია და კოვიდი მათ გადაასწრებს“.
კომენტარები