“ვართ თუ არა მოლდოვასა და უკრაინაზე წინ ? – როგორ ცდილობს “ოცნება” ხალხის მოტყუებას” – ვახო სანაია

ახლა იმის შესახებ, როგორ ცდილობს ,,ქართული ოცნება” ხალხის მოტყუებას.

ეს ანგარიში ეხება, ასე ვთქვათ, ტექნიკურ მხარეს.

მარტივად ავხსნი.

მაგალითად, გაქვთ სასამართლოს შენობა, რომელიც აკმაყოფილებს გარკვეულ დონეს, მაგრამ შიგნით არა გაქვთ სამართლიანობა.

გეუბნებიან, შენობა ნორმალურია – ამ ნაწილში გიწერთ დადებით შეფასებას, მაგრამ მთავარი არაა მაგ შენობაში – სამართლიანობა, მიუკერძოებლობა და კანონის უზენაესობა. ამიტომ თუ ევროკავშირის კანდიდატის სტატუსი გინდათ, ამ საქმეს მხოლოდ შენობა, ინფრასტრუქტურა და ტექნიკური გამართულობა არ ეყოფა, ის 12 პუნქტი უნდა შეასრულოთ, რაც შარშან ჩამოგიწერეთ.

ვართ თუ არა მოლდოვასა და უკრაინაზე წინ ? ტექნიკურ ნაწილში – კი. იმიტომ, რომ მანამდე გვაქვს ეტაპები გავლილი და შესაბამისად გამოგვადგა, მაგრამ ძირითად საკითხებში ჩამოვრჩებით – ამიტომ დაგვიწერეს ის თორმეტი პუნქტი შესასრულებლად, მოლდოვასა და უკრაინას კი პირდაპირ მიანიჭეს სტატუსი – ამ ორი ქვეყნის არჩევანი ევროპელებისთვის მკაფიოა, საქართველოს პოზიცია კი მათთვის უკიდურესად ბუნდოვანია. უკრაინამ გახსნა ეს შესაძლებლობა მოლდოვისა და საქართველოსთვის, ივანიშვილმა კი სწორედ უკრაინა გამოაცხადა მტრად, დასავლეთი – აგრესორად, ქვეყნის შიგნით კი მიწასთან გაასწორა დემოკრატია.

მთავარია, რა შინაარსის მატარებელია შენობა, რომელშიც სასამართლოა განთავსებული; მთავარია სამართლიანი გადაწყვეტილებები, თორემ შენობას როგორმე გავარემონტებთ; მთავარია საგარეო პოლიტიკური ორიენტაცია.

ასე რომ, კანდიდატის სტატუსის ბედი დამოკიდებულია იმ 12 პუნქტზე, რომლის შესრულება ხელისუფლებას ცოცხალი თავით არ სურს, მაგრამ ჩვენ, მოქალაქეებმა, ყველაფერი უნდა გავაკეთოთ, რომ ეს სტატუსი წელს მაინც მოვიპოვოთ.