საქართველოს ეროვნული უნივერსიტეტის (სეუ) ყოფილი სტუდენტი, თამარ ლომიძე ამბობს, რომ უნივერსიტეტის ადმინისტრაციამ სტუდენტის სტატუსი ფეისბუქპოსტის გამო შეუწყვიტა. თავს შეურაცხყოფილად ვგრძნობ“, – ამბობს „ბათუმელებთან“ თამარ ლომიძე. უნივერსიტეტის ადმინისტრაცია კი მიიჩნევს, რომ სტუდენტის პოსტი არაეთიკური იყო.
სტუდენტის სტატუსის შეწყვეტის შესახებ მან შეტყობინება 6 სექტემბერს წერილობით მიიღო, რის გამოც იძულებული გახდა, მობილობა ერთ დღეში მოესწრო.
„ოქმში წერია, რომ სტატუსს იმავე უნივერსიტეტში ვერ აღვიდგენდი, თუმცა სხვა უნივერსიტეტში შემეძლო მობილობით გადასვლა.
სტატუსი შემიწყვიტეს 6 სექტემბერს, მაშინ, როცა მობილობა 7 სექტემბერს სრულდებოდა. ერთ დღეში უნდა მომესწრო სხვაგან გადასვლა.
შეურაცხყოფილად ვგრძნობ თავს, რადგან, ფაქტორივად, გამაგდეს, დისკომფორტი შემიქმნა პროცესმა, რადგან არ არის მარტივი მობილობა, ძალიან ბევრი საბუთი გჭირდება და ასევე უნდა გაიარო ინდივიდუალური თუ ჯგუფური გასაუბრება. ეს დიდ სტრესთან იყო დაკავშირებული, რადგან ერთ დღეში მომიწია ამ ყველაფრის გავლა“, – ამბობს თამარი.
როგორც სტუდენტმა გვითხრა, ყველაფერი მას შემდეგ დაიწყო, როდესაც უნივერსიტეტის სტიპენდიატების ჩათში გამოსაშვები საღამოს შესახებ დაიწყო საუბარი და რექტორის, გია კავთელიშვილის მხრიდან იყო კომენტარი იმის შესახებ, რომ გამოსაშვებ საღამოს ვერ დაესწრებოდნენ ის სტუდენტები, რომლებიც „ფეისბუქში“ სეუ-ს შესახებ კრიტიკულ კომენტარებს წერდნენ.
„ამას წერდა ჩატში რექტორი. მეც დავაკომენტარე, რომ ეს თანასწორობის ფარგლებს სცდებოდა, რაზეც მან დამიკომენტარა, რომ ცხოვრებაში არაფერი გამიკეთებია და დიდი ამბიციები მაქვს.
რადგან საერთო ჩატი იყო და ბევრი ადამიანი კითხულობდა, რექტორს ვთხოვე, თუ რამე პრეტენზია ჰქონდა ჩემთან, იქნებ პირადად მოეწერა, რაზეც ასევე საჯაროდ დამიკომენტარა, რომ „მე ვინ ვარ, რომ პირადში დამიკავშირდეს“ და რომ თურმე საქმეებს ვურჩევ.
ბოლოს მითხრა, შენ ადგილზე, მობილობით გადავიდოდი სხვაგანო. მე მივწერე, რომ არ ვაპირებდი სადმე გადასვლას, რადგან პროგრამა მომწონდა. ამაზე მიპასუხა – მაგასაც ვნახავთ, თუ არ გადახვალო.“
ამის შემდეგ, როგორც თამარ ლომიძე ამბობს, მან ფეისბუქში პოსტი დაწერა, სადაც ამბობდა, რომ „მხოლოდ ქართულ უნივერსიტეტებში ზღუდავს უნივერსიტეტის ადმინისტრაცია სიტყვის თავისუფლებას და მიიჩნევს, რომ უნივერსიტეტს აქვს პატივისა და ღირსების უფლება…
რომ ამ ყველაფერთან ერთად გრძელი ენაც მქონია, თუმცა მაინც ვიტყვი, რომ ჩემი უფლებაა, მომწონდეს ან არ მომწონდეს რაღაც და ღიად ვამბობდე ამ ყველაფერს. ამის აკრძალვა სხვა არაფერია, გარდა სიბნელისა“, – წერდა თამარ ლომიძე.
ეს ტექსტი შეტანილია ოქმში და იმსჯელა უნივერსიტეტის ეთიკის კომისიამ, რის საფუძველზეც დაასკვნეს, რომ სტუდენტმა თამარ ლომიძემ ეს სტატუსი დაწერა მაშინ, „როცა უნივერსიტეტისთვის მნიშვნელოვანი პერიოდი იდგა, აბიტურიენტთა მიერ არჩევანის გაკეთება, სასურველი უნივერსიტეტის არჩევა და ა.შ“. ეს, ეთიკის საბჭოს აზრით, ზემოქმედებას მოახდენდა მათ გადაწყვეტილებებზე.
კომისიის დასკვნაში ასევე წერია, რომ სტუდენტმა დახურული ჯგუფიდან რექტორის მიმოწერები შეცვლილი კონტექსტით, „ამოგლეჯილი გამოიტანა“, რაც მიმართული იყო რექტორის და კონკრეტულად, სეუ-ს რეპუტაციის წინააღმდეგ.
თუმცა თამარ ლომიძის ფეისბუქის პოსტში არსად არის ნახსენები არც რექტორის სახელი და გვარი და არც კონკრეტული უნივერსიტეტი.
ეთიკის კომისია ოქმში ასევე წერს, რომ დახურულ ჯგუფში რექტორის მხრიდან ნახსენებ „გრძელ ენაში“ იგულისხმებოდნენ ის კურსდამთავრებულები, რომლებმაც სოციალურ ქსელში განათავსეს სეუ-ს შეუარცხმყოფელი პოსტი („ბანძები“) და არა თამარ ლომიძე.
თამარ ლომიძის სტატუსზე უნივერსიტეტის ეთიკის კომისიამ 48 წუთი იმსჯელა და სტუდენტის წინააღმდეგ სასჯელის უმაღლესი ზომა, სტატუსის შეწყვეტა გამოიყენა.
მიუხედავად იმისა, რომ სტუდენტის სტატუსში ერთი შეხედვით არ ხდება კონკრეტული პირებისა თუ უნივერსიტეტის იდენტიფიცირება, კომისიის წევრები მაინც მიიჩნევენ, რომ სტუდენტის პოსტი აზიანებს რექტორისა და უნივერსიტეტის იმიჯს.
მიუხედავად იმისა, რომ თამარ ლომიძე წარმატებული სტუდენტი და უნივერსიტეტის სტიპენდიანტი იყო, ეთიკის საბჭომ არ გამოიყენა სასჯელის ფორმები: „გაფრთხილება“, „საყვედური“, „სასტიკი საყვედური“, „სტიპენდიის შეზღუდვა“ და მას პირდაპირ სტატუსი შეუჩერა.
„რექტორი სქრინავდა სხვა სტუდენტების პოსტებს, აზიარებდა საერთო ჩათში და წერდა – „ეს ხომ არ გავრიცხოთ?“, „გასარიცხია?“ ან მათ პირად მონაცემებს აზიარებდა ჩვენთან.
ერთ-ერთი სტუდენტი წერდა, რომ „გამოცდაზე მისვლას ვერ ვახერხებ, რადგან საქართველოში არ ვარ“. ამ პოსტს აზიარებდა ჩათში და წერდა, რომ ტყუის და რომ „გერმანიაში გავლილიც კი არ არის“ და აი, ასეთ დამამცირებელ კომენტარებს წერდა და არც სახელსა და გვარს ფარავდა იმ კონკრეტული სტუდენტის.
ამის გამო დისკომფორტი მქონდა ყოველთვის, მაგრამ ვცდილობდი არ შევსულიყავი დისკუსიაში, მაგრამ როცა დაწერა, რომ კრიტიკულად განწყობილი სტუდენტები გამოსაშვებ საღამოს ვერ დაესწრებოდნენ, მაშინ გამოვხატე ჩემი აზრი და ეს გახდა გადამწყვეტი იმისთვის, რომ სტატუსი შეეწყვიტათ“, – გვეუბნება თამარ ლომიძე.
„ბათუმელები“ კომენტარისთვის სეუ-ს ადმინისტრაციას დაუკავშირდა და ჰკითხა, თუ რა გახდა თამარ ლომიძისთვის სტატუსის შეწყვეტის საფუძველი, იყო თუ არა ამის მიზეზი ფეისბუქში გამოქვეყნებული პოსტი, როგორც ეს ეთიკის კომისიის დასკვაში ეწერა, თუ არსებობს კიდევ სხვა გარემოებები?
უნივერსიტეტის ადმინისტრაციამ კითხვაზე პასუხი წერილობით გაგვცა.
მათ მიერ გამოგზავნილ წერილში წერია, რომ „ეთიკის კომისიის გადაწყვეტილება თამარ ლომიძესთან დაკავშირებით სრულ შესაბამისობაშია საქართველოს კანონმდებლობის მოთხოვნებსა და უნივერსიტეტის რეგულაციებთან და ეფუძნება განსახილველ საკითხთან დაკავშირებულ ფაქტობრივ გარემოებებსა და არსებულ მტკიცებულებებს.
მათ შორის, საქმის მასალებში ინახება მტკიცებულება, თავად თამარ ლომიძის აღიარების სახით, იმასთან დაკავშირებით, რომ საჯარო პოსტი საქართველოს ეროვნული უნივერსიტეტი სეუ-ს და მისი რექტორისადმი იყო მიმართული და შესაძლო იყო მისი იდენტიფიცირება აუდიტორიის მხრიდან“, – წერია სეუ-ს მიერ მოწოდებულ წერილში.
სეუ-ს განცხადებით, თამარ ლომიძის „ბოლოდროინდელი განცხადებები საჯარო პოსტის ზოგადი ხასიათის შესახებ“, წინააღმდეგობაში მოდის ეთიკის კომისიის წინაშე გაკეთებულ მისსავე განმარტებასთან.
თამარ ლომიძე არ იზიარებს ადმინისტრაციის განცხადებას და უნივერსიტეტთან სამართლებრივ დავას აპირებს.
წყარო – ბათუმელები.
კომენტარები