საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
“11 ნოემბრის შეჯამება უკრაინაში:
– 2 მარტიდან 11 ნოემბრამდე – ხერსონის ოკუპაციის თარიღია.
– მას შემდეგ რაც რუსებმა დატოვეს ქალაქი ხერსონი ანტონოვის ხიდის ნარჩენი გადასასვლელი გაანადგურეს. ეს ინდიკატორია რუსები ხერსონის მიმართულებით დეკლარირების დონეზეც კი აღარ აპირებენ არანაირი სახის კამპანიის წარმართვას და ახლა მხოლოდ შეკავებაზე არიან ორიენტირებული.
– რუსებმა გაანადგურეს ელექტრომომარაგების ხაზები და ცენტრები, რის შედეგადაც ხერსონს დენი არ მიეწოდება.
– ხერსონის გათავისუფლებას ბევრი რუსი ტყვის ჩავარდნა არ მოჰყოლია. რა თქმა უნდა არიან ათეულობით ტყვეები, მაგრამ მათი უმრავლესობა ის ადამიანია, რომლებიც წინა ხაზზე დატოვეს მაშინ, როდესაც უკან მყოფები გაიქცნენ. სამაგიეროდ, სავარაუდოდ, დიდი რაოდენობით იქნება ის მძიმე ტექნიკა და არტილერიის ნაწილი მოპოვებული, რომლის გატანაც ადვილად და დაჩქარებულად ვერ მოხდებოდა. განსაკუთრებით მნიშვნელოვანი კი შემორჩენილი იარაღის საწყობებია, რომლითაც უკრაინული დანაკლისის შევსება მოხდება.
– ხერსონში მოსახლეობა გარკვეული რაოდენობით კიდევაა შემორჩენილი. მოქალაქეების მნიშვნელოვანი რაოდენობა თებერვალში გაიხიზნა ქალაქიდან ხოლო მეორე ნაწილი ახლახან რუსების იძულებითი ევაკუაციის ფონზე აღმოჩნდა ქალაქს მოწყვეტილი.
– ახლა უკრაინელები რამდენიმე დღეში პოლიციასთან ერთად სრულიად გაწმენდენ ხერსონის რაიონს და აღადგენენ სამართლებრივ წესრიგს. ამის შემდგომ სავარაუდოა, რომ რუსული პოზიციების დამუშავება დაიწყება როგორც ნოვა კახოვკას ისე მდინარე დნეპრის აღმოსავლეთ სანაპიროზე გადაყვანილი რუსული ნაწილების მიმართულებით. შესაძლოა ინტენსივობამ იმატოს ზაპორიჟიას რაიონშიც.
– უკრაინელებმა დაიწყეს ბელარუსის საზღვრის გამაგრება. რეალურად, თითოეული ასეთი ოპერაცია მინიშნებაა იმ ფაქტზე, რომ თუკი ბელარუსიდან რაიმე აგრესიული აქტივობა იქნება უკრაინის წინააღმდეგ უკრაინელები მომზადებულები და გამაგრებულები დახვდებიან მათ.”
კომენტარები