meta-მ საქართველოში 117 ანგარიში წაშალა, რომლებიც მათი განცხადებით, დაკავშირებული იყო მთავრობის ადმინისტრაციის სტრატეგიული კომუნიკაციების დეპარტამენტთან.
წაშლილ ანგარიშებს შორის არის 80 Facebook ანგარიში, 26 გვერდი, 9 ჯგუფი, და ორი Instagram ანგარიში, რომლებიც ჩართული იყვნენ არაავთენტურ ქცევაში.
meta-ს განცხადებით, ეს გვერდები და ჯგუფები ადგილობრივ და დამოუკიდებელ პრო-სამთავრობო ჯგუფებს წარმოადგენდნენ. განცხადებაში ნათქვამია, რომ ქსელის მთავარი მიზანი იყო გაეძლიერებინა კონტენტი საქართველოს ამჟამინდელი ხელისუფლების მხარდასაჭერად, მათ შორის ოფიციალური სამთავრობო გვერდებისა და პრო-სამთავრობო მედიის ანგარიშების ხელახალი გაზიარების ჩათვლით.
განცხადების მიხედვით, შიდა გამოძიების შედეგად რეგიონში აღმოაჩინა “საეჭვო კოორდინირებული არაავთენტური ქცევა”.
Meta-ს ანგარიშის მიხედვით, Facebook-თან ერთად ქსელში იყო ჩართული სამი TikTok-ანგარიშიც, ორი მათგანი კი პოზიციონირებდა, როგორც პრემიერ-მინისტრ ირაკლი ღარიბაშვილთან დაკავშირებული ანგარიში:
- http://tiktok[.]com/@juurnalistebi
- http://tiktok[.]com/@igaribashvili
- https://www.tiktok[.]com/@irakli4georgia
„ქსელი ფუნქციონირებდა 24 საათის განმავლობაში, რათა გაეზარდა მასალებზე ცნობადობა საქართველოს ამჟამინდელი ხელისუფლების მხარდასაჭერად, მათ შორის ოფიციალური სამთავრობო გვერდების და პროსამთავრობო მედიის ანგარიშების გადაზიარების ჩათვლით.
ისინი ასევე ავრცელებდნენ კრიტიკას ოპოზიციის მიმართ, განსაკუთრებით ბოლოდროინდელი საპროტესტო გამოსვლების დროს, რაც ე.წ. უცხოური აგენტების შესახებ კანონპროექტის განხილვას მოჰყვა. ეს ქსელი რეალურ დროში მიჰყვებოდა საპროტესტო მოვლენებს, მათ შორის შუაღამისასაც კი. ქსელის უკან მყოფი პირები აქვეყნებდნენ მიმებს, ტექსტურ მასალებსა და კომენტარებს, ძირითადად, ქართულ ენაზე.
მიუხედავად იმისა, რომ ამ ოპერაციის უკან მყოფი პირები ცდილობდნენ თავიანთი ვინაობისა და კოორდინაციის დამალვას, ჩვენმა გამოძიებამ აღმოაჩინა მათი კავშირი საქართველოს მთავრობის ადმინისტრაციის სტრატეგიული კომუნიკაციების დეპარტამენტთან“, – ნათქვამია Meta-ს ანგარიშში.
კომპანია აღნიშნავს, რომ Facebook-სა და Instagram-ზე რეკლამისთვის დაახლოებით 33 500 აშშ დოლარი დაიხარჯა.
კომენტარები