ცვატა ბერძენიშვილი ინფლაციაზე – “სურათი, რეალურად, უფრო მძიმეა, ვიდრე “რეალური ინფლაცია ეროვნული ბანკის ინფლაციის მიზნობრივ მაჩვენებელს ემთხვევა”

სტატისტიკოსი, მონაცემთა ანალიტიკოსი, ცვატა ბერძენიშვილი, სოციალურ ქსელში, წერს:

ბოლო პერიოდში, თითქოს ინფლაცია დასტაბილურდა. ბოლო 3 წელია საშუალო წლიური ინფლაცია წინა წლის საშუალო წლიურთან ნორმალურადაა:

2023 – 2.6%

2024 – 1.1%

2025 (პირველი 7 თვე) – 3.3%

ერთი შეხედვით, კარგი რიცხვებია, მაგრამ ამ რიცხვებს არ უნდა მივცეთ მანიპულირების და საკუთარი თავის მოტყუების საშუალება.

პირველ რიგში ის, რომ პანდემიის პერიოდში გვქონდა კატასტროფული ინფლაცია შემდეგ წლებში დაბალი მაჩვენებელი ვერ აბალანსებს წინა წლების მაჩვენებელს:

2020 – 5.2%

2021 – 9.6%

2022 – 11.9%

მეორე ის, რომ “ინფლაცია 3.3%-ია” ისე ჟღერს, როგორც “საშუალო ხელფასი X ლარია”.

ჩემი ხელფასია 6000 ლარი, შენი – 600 ლარი. საშუალოდ ორივეს 3300 ლარი გვაქვს ხელფასი და, თითქოს, ძალიან კარგია, მაგრამ, რაღაცნაირად, შენი 600 ლარიანი ხელფასით კარგად ვერ ხარ, არა? არადა 3300 ლარი გაქვს საშუალო ხელფასი და კარგად უნდა იყო.

ინფლაციის პროცენტიც გაშუალოებული მონაცემია, სადაც 305 პროდუქტის თუ მომსახურების ფასი შედის, მაგრამ მოსახლეობის აბსოლუტურ უმრავლესობას 305-ვე თანაბრად არ აღელვებს – ყველას სხვადასხვა ხვედრითი წონა აქვს და ყველაზე დიდი ხვედრითი წონა აქვს კატეგორიას “სურსათი და უალკოჰოლო სასმელები”.

ზოგადად, კანონზომიერებაა – რაც უფრო ცოტა აქვს შემოსავალი ადამიანს, მით უფრო მეტს (პროცენტულად) ხარჯავს კვებაზე და პირიქით.

დაქირავებით დასაქმებულთა მედიანური ხელფასი (საშუალოს აღებას აზრი არ აქვს) 2023 წელს (უფრო ახალი მონაცემი არ გვაქვს) იყო 1238 ლარი. ჩემი უხეში ექსტრაპოლაციით, 2025 წლისთვის უნდა იყოს 1520 ლარი – თან დარიცხული. საპენსიოს და საშემოსავლოს დაქვითვის შემდეგ ხელზე ასაღები თანხა 1200 ლარზე ნაკლები რჩება. ეს ნიშნავს, რომ დასაქმებული მოსახლეობის ნახევარს 1190 ლარი ან უფრო ნაკლები აქვს თვიური შემოსავალი და, ვვარაუდობ, რომ მეორე ნახევრის მნიშვნელოვანი წილიც მაგ რიცხვთან ახლოს იქნება.

ბუნებრივია, რომ ამ შემოსავლის ადამიანისთვის ძირითადი ხარჯი იქნება კვება და ჯანდაცვა და ნაკლებად – ტანსაცმელი, ფეხსაცმელი თუ ავტომობილის შეძენა.

ამ დათქმით თუ შევხედავთ, ჯამური ინფლაცია 2025 წელს კი არის 3.3%, მაგრამ სურსათზე და უალკოჰოლო სასმელებზე 2025 წელს ინფლაცია 7%, ხოლო ჯანდაცვაზე – 7.9%-ა. ის ფაქტი, რომ მაცივრები, სარეცხის მანქანები და კავშირგაბმულობა მცირედ გაიაფდა, ხოლო ტანსაცმელი, ფეხსაცმელი და ავტომობილი (:დ) თითქმის იგივე დარჩა, დიდი შეღავათი არაა.

საერთოდაც, 2020 წლეთან შედარებით 2025 წელს ჯამური ინფლაცია 31%-ია, ხოლო სურსათი და უალკოჰოლო სასმელების კატეგორიაში – 45%, ამბულატორიის კი – 49%-ა. სახლს გარეთ კვება 59%-ითაა გაძვირებული, ჰიგიენური საშუალებები – 45%-ით.