კულტურის მინისტრის ბრიფინგის დასრულებიდან დაახლოებით ერთ საათში გელათის მონასტერში შინაგან საქმეთა სამინისტროს ექსპერტ-კრიმინალისტები გამოჩნდნენ. ისინი სასულიერო პირებს შეხვდნენ, თუმცა ტერიტორია კომენტარის გარეშე დატოვეს.
“მთავარ არხთან” გელათში მყოფი ადამიანები ამბობენ, რომ საგამოძიებო უწყების წარმომადგენლები გადახურვის სამუშაოებთან დაკავშირებით მივიდნენ. მათივე თქმით, მიიღეს დირექტივა, რომ ხარაჩოებზე უცხო პირებმა დღეიდან აღარ იმოძრაონ.
“ეს ბალკონი არის მოყანყალებული, საშიშროებაა, ბავშვები რომ ავიდნენ და გადმოვარდნენ ვერაფერი ვეღარ უშველის, დაგვიფარონ ღმერთმა, უნდა გაასწორონ, გაამაგრონ და მერე შეიძლება დაუშვან”, – ამბობს ერთ-ერთი რესპოდენტი.
შეგახსენებთ, რომ დღეს მინისტრმა თეა წულუკიანმა ყველას სთხოვა ხარაჩოებზე “არ იბოდიალონ”. ძეგლთა დაცვის სააგენტომ კი ხარაჩოებზე უცხო პირთა შესვლა აკრძალა.
თუ “მოყანყალებულია”, “ბოდიალი” უნდა ავკრძალოთ, აბა, ხომ არ გავამაგრებთ.
შსს-ს ექსპერტ-კრიმინალისტები თითის ანაბეჭდებს აიღებენ, თუ გამაგრებით სამუშაოებს დაიწყებენ?
საერთოდაც, “სჯობს”, სულაც აიკრძალოს გელათთან მიახლოება, ასე ვერავინ გაიგებს, წყალი ისევ ჩადის, თუ არა, ან, კიდევ რამდენი ფრესკა დაზიანდა და მინისტრი წულუკიანის სიმშვიდეს, გელათში გადაღებული ფოტომასალა აღარ დაარღვევს.
კომენტარები