“წყლის ჭავლში ნივთიერება იყო გარეული” – კობახიძე

ირაკლი კობახიძე ადასტურებს, რომ გასულ წელს ნოემბერ-დეკემბრის საპროტესტო აქციებზე მოქალაქეების დასაშლელად გამოყენებულ წყლის ჭავლში გარკვეული ნივთიერება გამოყენებული იყო, თუმცა, უარყოფს, რომ ეს იყო „კამიტი“. იგი ჯერ ამბობს, რომ შსს–ს აქვს ფაქტები, რომ არ გამოყენება “კამიტი”, შემდეგ კი ამბობს, რომ შსს იმ დოკუმენტებზე დაყრდონით საუბრობს, რომლებიც მათ ხელთაა. კობახიძე ახლაც არ ამბობს, კონკრეტულად რა ნივთიერება იყო გამოყენებული.

„რაც შეეხება [წყლის ჭავლში] ნივთიერების გარევას – ნივთიერება იყო გარეული. მთავარია, იყო თუ არა ეს ნივთიერება აკრძალული. რაც შეეხება ინფორმაციას „კამიტის“ გამოყენებასთან დაკავშირებით – ამაზე მტკიცებითი ფორმით საუბრობდა BBC, თუმცა, შსს-მ უკვე დაადასტურა ფაქტი, რომ არათუ არ გამოყენებულა ეს ნივთიერება, არც არასდროს შეუძენია შსს-ს, მათ შორის, არც ნაცმოძრაობის რეჟიმის პირობებში.

დანარჩენი – მიმდინარეობს გამოძიება, გამოძიებას აწარმოებს სუსი. ყველა დეტალი იქნება გასაჯაროებული საზოგადოების წინაშე გამოძიების დასრულების შემდეგ.

რაც შეეხება „კამიტის“ გამოყენებას – ეს უკვე უარყო შსს-მ იმ დოკუმენტებზე დაყრდნობით, რაც მის ხელთაა“ – თქვა მან.