“ცოცხალი ჩემს ბინას, ჩემს რაიონს არ დავტოვებ! იქიდან ვწერ, სადაც ჩემი დამცველი არავინაა” – ახალგორელი აქტივისტი დახმარებას ითხოვს!

ახალგორელი აქტივისტი თამარ მეარაყიშვილი, სოციალურ ქსელში წერს:

✅პარასკევს, 17 იანვარს ქ. ცხინვალში უზენაესი სასამართლოს კოლეგიამ განიხილა პროკურატურის საკასაციო სარჩელი, რომელიც არ ეთანხმებოდა ჩემს გამამართლებელ განაჩენს. ცილისწამების ბრალდებაში პირველი ინსტანციის გამამართლებელი გადაწყვეტილება ძალაში დატოვა- მომიხსნა ბრალდება, მაგრამ ორი- პასპორტთან დაკავშირებული პირველ ინსტანციაში დააბრუნდა განსახილველად. სასამართლოზე იყო მინიშნება ჩემი საცხოვრებელი რაიონიდან გაძევების საკითხის დაყენებაზე- ეს იყო მიზეზიც ჩემი დაპატიმრებისა.

დღეს 21 იანვარია. არაერთმა მედიამ დამითმო დრო და ადგილი, ტელევიზიებმა პირდაპირი ეთერით მომცეს საშუალება მესაუბრა ამ საფრთხეზე, გამომეხმაურნენ ჟურნალისტები, სამოქალაქო საზოგადოების წარმომადგენლები, მეკითხებიან – რა შეიძლება გაკეთდეს ამის შესაჩერებლად, მაგრამ დუმს როგორც მთელი ჩემი დევნის პერიოდი- ხელისუფლება. ამ დუმილში კარგად გამოხატავენ ზიზღს და მიუღებლობას რაც ჩემს მიმართ დაუგროვდათ- როგორც ბიბილოვისთვის, მათთვისაც მიუღებელი ვარ, მათაც დისკომფორტს ვუქმნი მოუგვარებელი პრობლემების გახმოვანებით.
დუმდა ხელისუფლება, როცა გავუჩინარდი, როცა ს/ს საქმეებს წერდა ჩემს წინააღმდეგ ბიბილოვის პროკურატურა, როცა სოციალური ქსელით ვითხოვდი ადვოკატის, ტელეფონის, სასამართლოზე დასასწრებ გზის ხარჯს…
ამის პარალელურად მინისტრი ჩემზე ამბობდა, რომ წლების განმავლობაში გადატანილი სტრესის გამო არაადექვატური გავხდი და ყურადღებას ნუ მიაქცევთ, ძალიან გვეცოდება ასე რომ დაემართა. და ამის პარალელურად თხზავდა ჭორებს და თავადვე ახდენდა ტირაჟირებას ჩემი მარგინალიზაციისთვის. რატომ?- არ არსებობს ადამიანი? არ არის პრობლემა.
ამ ტექსტს რომ იქიდან ვწერ, სადაც ჩემი დამცველი არავინაა, მე რომ მომიწია ამის შეხსენება საზოგადოებისთვის- რა ვთქვა?

ჩემი მდგომარეობა არაა დამამშვიდებელი, ჩემი მშობლიური რაიონიდან გამოძევების რეალური საფრთხის წინაშე და ვითხოვ ყველაფერი გაკეთდეს იმისთვის, რომ დასრულდეს ჩემი დევნა.

მოვითხოვ, მსოფლიოს ადამიანის უფლებების დამცველმა უმაღლესმა პირებმა გააკეთონ განცხადებები და იცოდნენ რისთვისაც მსჯიან- სხვისი უფლებების დაცვა.

თქვენ, მეგობრებო გთხოვთ გააზიაროთ- ცოცხალი ჩემს ბინას, ჩემს რაიონს არ დავტოვებ!”