აშშ-ის პრეზიდენტმა დონალდ ტრამპმა განაცხადა, რომ მშვიდობის დარგში ნობელის პრემიის გამარჯვებულს, ვენესუელელ ოპოზიციონერს მარია კორინა მაჩადოს შეეძლო ჯილდო მისთვის გადაეცა.
ტრამპის თქმით, ვენესუელელმა პოლიტიკოსმა ჯილდო მშვიდობის დარგში მისი წყალობით მიიღო.
„ადამიანმა, რომელმაც ნობელის პრემია მიიღო, დღეს დამირეკა და მითხრა: „მე ამ ჯილდოს თქვენს პატივსაცემად ვიღებ, იმიტომ რომ თქვენც ნამდვილად იმსახურებდით მას“. ეს ძალიან სასიამოვნო საქციელი იყო. მე მისთვის არ მითქვამს: „მაშინ [ჯილდო] მე მომეცი“, თუმცა, მას ეს უნდა ექნა. ის ძალიან თავაზიანი იყო. იცით, მე მთელი ამ ხნის განმავლობაში მას ვეხმარებოდი. ვენესუელაში მათ დახმარება სჭირდებათ. იქ სრული კატასტროფაა“, – განაცხადა ტრამპმა.
ცნობისთვის, გუშინ ნობელის პრემიის კომიტეტმა მშვიდობის დარგში ჯილდო ვენესუელელ ოპოზიციონერს მარია კორინა მაჩადოს გადასცა.
წელს მშვიდობის დარგში ნობელის პრემიაზე 224 ფიზიკური პირი და 94 ორგანიზაცია იყო წარდგენილი. კანდიდატებს შორის აშშ-ის პრეზიდენტი დონალდ ტრამპიც იყო. მან ჯილდოს მოპოვება ვერ შეძლო.
კომენტარები