“ტყუილია, რომ ჩემი კანდიდატურა იქნება მოხსნილი, ჩვენ არასერიოზული ადამიანები არ ვართ” – ხაბეიშვილი

„ნაციონალური მოძრაობის“ თავმჯდომარეობის კანდიდატმა, ლევან ხაბეიშვილმა ზურაბ ჭიაბერაშვილზე საუბრისას განაცხადა.

„არავის განკითხვა ჩემი საქმე არ არის. ამ ადამიანს, მის გონიერებას, ნიჭს პატივს ვცემ, თუმცა ამ შემთხვევაში უნდა ვთქვათ, რომ „ნაციონალური მოძრაობის“ არჩევნები არის შიდაპარტიული და არა გარეარჩევნები. პოლიტსაბჭოში მომხრეები თუ ეყოლება, რომლებიც მის კანდიდატურას დააყენებენ, ამაში პრობლემას ვერ ვხედავ. ყოველგვარი სპეკულაცია იმის შესახებ, რომ რაიმე სახით ხაბეიშვილის კანდიდატურა იქნება მოხსნილი, არის მდარე ტყუილი. შესაბამისად, ტყუილებზე, ფეიკნიუსებზე ლაპარაკი სირცხვილია. ჩვენ არასერიოზული ადამიანები არ ვართ, სერიოზულ საქმეზე ვართ, მათ შორის შიდაპარტიულ არჩევნებზე ვსაუბრობთ. აქამდე შეხვედრები მქონდა გორში, რუსთავში, თელავში, აქტიურად ვაპირებ შეხვედრებს გურიაში, აჭარაში არა მარტო შიდაპარტიული არჩევნებისთვის, არამედ იმისთვის, რომ  „ნაციონალურმა მოძრაობამ“ მოახერხოს მობილიზება. მთავარი მობილიზება ჩვენ გვჭირდება რუსი ოლიგარქის წინააღმდეგ“