პოლიტიკოსი, ირინა სარიშვილი:
“თუ ირანის ხელისუფლება საპროტესტო აქციებზე დაკავებულ მომიტინგეებს სიკვდილით დასჯის, აშშ მკაცრ ზომებს მიიღებს” – ტრამპის ეს პოლიტიკურად და მორალურად არასწორი განცხადება მთელმა მსოფლიომ ანალიზის გარეშე მიიღო. რატომ? იმიტომ რომ მანამდე, 20 ათასი ადამიანის მკვლელობის, საავადმყოფოებში დაჭრილების დახვრეტის ფონზე, დაკავებულ მომიტინგეთა საჯარო ჩამოხრჩობაზე ინფორმაციამ 26 წლის ახალგაზრდა კაცის ფოტოთი ემოციურად ყველაფერი გადაფარა. ამას მოჰყვა, ისევ და ისევ პროტესტანტთა ხოცვა-ჟლეტის ფონზე, ირანის საგარეო საქმეთა მინისტრის განცხადება რომ არანაირი ჩამოხრჩობა არ იგეგმებაო, რაც ტრამპმა უკან დახევად და მისი ულტიმატუმის შესრულებად ჩათვალა. მოგვიანებით გაჩნდა ინფორმაცია სიკვდილმისჯილთა ბრალის გადაკვალიფიცირებაზე, რაც მრავალწლიან პატიმრობას ითვალისწინებს. 20 ათასამდე პროტესტანტის დახოცვა და საავადმყოფოებში დაჭრილების ჩაცხრილვა კი იმით აიხსნა რომ ირანის ხელისუფლება ტერორისტებს ესროდა და არა მომიტინგეებს.
რას მოიმოქმედებს ამჯერად ტრამპი – დაკმაყოფილდება ირანის ხელისუფლების ამ ცინიზმით სავსე განცხადებებით და აღარ მიიღებს მკაცრ ზომებს მათ წინააღმდეგ თუ დაეხმარება ირანელ ხალხს ტირანიის დამხობაში – ტრამპის ამ გადაწყვეტილებაზეა დამოკიდებული, ირანის რეჟიმი გაიმარჯვებს თუ დამარცხდება საერთაშორისო არენაზე. დიახ, საერთაშორისო არენაზე და არა თვითონ ირანში, რადგან ირანელ ხალხს თავისუფლებისთვის ბრძოლა ტრამპის იმედის ამარა არ დაუწყია და ამიტომ ვერც მასში იმედგაცრუება შეაწყვეტინებს ბრძოლას. უბრალოდ ტრამპის გაჩერების შემთხვევაში ირანელი ხალხი მარტო დარჩება ამ ბრძოლაში და მის მიტოვებაზე პასუხისმგებელი იქნება აშშ, ქვეყანა, რომელიც ამ წუთამდე ითვლება თავისუფლების, დემოკრატიის კერად და ამ ღირებულებების დამცველად მთელს მსოფლიოში. ანუ, მოკლედ რომ ვთქვათ, თუ ტრამპი უარს იტყვის ირანელი ხალხის დახმარებაზე რეჟიმის დამხობაში, ამით ის ირანელ ხალხს საბოლოოდ ბრძოლას ვერ შეაწყვეტინებს, მაგრამ თავად მისი კარიერა ბევრად სწრაფად დასრულდება, ვიდრე ეს მას წარმოუდგენია, რადგან ამერიკა თავის ისტორიულ მისიაზე უარს არც ერთი პრეზიდენტის გამო არ იტყვის.თავისუფლება და გამარჯვება ირანელ ხალხს!
კომენტარები