“თუ მოითხოვს საწვავს აფხაზური მხარე, დიდი სიამოვნებით კიდევ მივაწვდი” – “სოლიდესი”

კომპანია, რომელმაც საწვავი ოკუპირებულ აფხაზეთში შეიტანა შპს “სოლიდუსია“.

კომპანიის მფლობელმა გიორგი არველაძემ თქვა, რომ 7.წელია სხვადასხვა პროდუქტები შეაქვს გასაყიდად ოკუპირებულ ტერიტორიაზე.

იგი აცხადებს რომ საქართველოს მთავრობა არ იყო საქმის კურსში და ამბობს, რომ ვერ იტყვის, ვისგან იყიდა საწვავი.

არველაძემ bm.ge-სთან თქვა:

ეს შესაძლებლობა [აფხაზეთში მიწოდების] ახლა პირველად გაჩნდა. აქამდე იცით, რომ რუსულ საწვავს მთლიანად დაკავებული ჰქონდა აფხაზეთის ბაზარი. ბოლო 30 წლის განმავლობაში ამ სახის ტრანზაქცია პირველად განხორციელდა. ეს ჩემი და ჩემი აფხაზი მეგობრების დამსახურებაა. წერენ აბსურდულ, ასტრონომიულ ციფრებს — თითქოს 3000 ტონაზეა საუბარი, სინამდვილეში კი 300 ტონას ეხება საქმე.

საწვავი ძირითადად გალის ავტოგასამართ სადგურებს მივაწოდეთ. მოსახლეობისთვის. ადგილზე ჰუმანიტარული კრიზისი იქმნებოდა, 30-40 ათასი ქართველი 20-ლიტრიანი კანისტრებით გადმოდიოდა ზუგდიდში.

წლებია, მკაცრად კანონის ფარგლებში ვმუშაობთ. უბრალოდ, ახლა ბენზინის თემა გახდა აქტუალური.

ტვირთის შეტანა იოლი არ გახლავთ. ეს იყო პირველი შემთხვევა, როდესაც აფხაზურმა მხარემ ოფიციალურად დაადასტურა, რომ ნავთობპროდუქტებს საქართველოდან იღებს.

სპეციალურად ჩავედი და ვესაუბრე. ექვსი დღე ვიყავი ადგილზე. აფხაზებთან ხშირი ურთიერთობა მაქვს, რადგან ერთობლივ საქმიანობას ვაწარმოებთ.

აქ დიდ რაოდენობებზე არ არის საუბარი. სულ სამ-სამი მანქანა ჯამში ცხრა ავტოცისტერნა მივაწოდეთ. მაქსიმუმ 300 ტონაზეა საუბარი და არა 3000-ზე. 3000 ტონას გემი სჭირდება.

3000 ტონა თავისუფალი რეზერვი დღეს საქართველოში არავის აქვს, რომ ვინმეს გამოართვა.

ვფიქრობ, საერთო ენის გამონახვა ყველას გაუხარდება. ისეთი პირობები შეიქმნას, რომ ქართველებმა და აფხაზებმა სულ ერთად ვაკეთოთ საქმე, მათ შორის ნავთობპროდუქტების სფეროშიც.

გიორგი არველაძე არ ასახელებს კომპანიას, ვისგანაც შეიძინა საწვავი.

კიდევ ერთ ტელევიზიასთან, ტვ პირგელთან, არველაძე, ამბობს:

თუ იქნება აფხაზური მხარისგან მოთხოვნა, დიდი სიამოვნებით კიდევ მივაწვდი.

კითხვას, არსებობს თუ არა რისკი, საწვავი რუსეთს ჩავარდნოდა ხელში, არველაძე პასუხობს, რომ რისკისგან დაზღვეული არავინაა.

ცნობისთვის, ინფორმაცია რომ 3 000 ტონა საწვავი შევიდა ოკუპირებულ აფხაზეთში, ქართული ოცნების ერთ-ერთმა ლიდერმა, რატი იონათამიშვილმა გაავრცელა.