“თუ გინდა რომ ყველას უყვარდე, იყიდე სამარშრუტო ტაქსი, ჩადგი შიგნით მაცივარი და ნაყინის გაყიდვა დაიწყე” – ლევან ღამბაშიძე

ფილოსოფოსი, ლევან ღამბაშიძე:

წარმოიდგინეთ, მთავრობამ გააკეთა შადრევანი, რომელმაც თქვენი შვილის სიცოცხლე შეიწირა, თქვენ კი არ შეგიძლიათ მთავრობა ამის გამო ლანძღოთ, ვინაიდან მთავრობის ლანძღვა აკრძალულია.

წარმოიდგინეთ, მთავრობის წევრმა ქვეყნის ბიუჯეტიდან მოიპარა თქვენს მიერ ბიუჯეტში გადახდილი ფული, რამდენიმე მილიონი, რომელიც თქვენს საჭიროებებს უნდა მოხმარებოდა, თქვენ კი არ შეგიძლიათ მთავრობა ამის გამო ლანძღოთ, ვინაიდან მთავრობის ლანძღვა აკრძალულია.

წარმოიდგინეთ, მთავრობამ ხელი მოაწერა მტერ სახელმწიფოსთან თანამშრომლობას და დავუშვათ თქვენი ქვეყნის ნაწილი მტერ სახელმწიფოს გადასცა, თქვენ კი არ შეგიძლიათ მთავრობა ამის გამო ლანძღოთ, ვინაიდან მთავრობის ლანძღვა აკრძალულია.

წარმოიდგინეთ, მთავრობამ სპეცრაზმს ბრძანება მისცა, რომ უმოწყალოდ დაერბია მიტინგი, რომელზეც თქვენ, თქვენი შვილი, თქვენი ოჯახის სხვა წევრები იმყოფებოდით, თქვენ კი არ შეგიძლიათ მთავრობა ამის გამო ლანძღოთ, ვინაიდან მთავრობის ლანძღვა აკრძალულია.

წარმოიდგინეთ, მთავრობამ კულტურული მემკვიდრეობის ძეგლი გაანადგურა, რომელიც თქვენთვის უდიდესი საკრალური მნიშვნელობის მატარებელი იყო, თქვენ კი არ შეგიძლიათ მთავრობა ამის გამო ლანძღოთ, ვინაიდან მთავრობის ლანძღვა აკრძალულია.

წარმოიდგინეთ, რომ ზოგადად მთავრობის ლანძღვა აკრძალულია და მხოლოდ მისი ქებაა ნებადართული.

თუ ეს ყველაფერი წარმოიდგინეთ და მაინც თანხმდებით ასეთი მთავრობის მმართველობას, ეს მხოლოდ ორი რამის მანიშნებელი შეიძლება იყოთ:

1) ხართ მთავრობის წევრი ან მისი მხარდამჭერი და ფიქრობთ, რომ ყველა დანარჩენი ვალდებულია პირუტყვივით ითმინოს უკანონობა, რაც აბსოლუტური სისულელეა, ვინაიდან ადრე თუ გვიან მთავრობა შეიცვლება და შემდეგ შენ აღმოჩნდები პირუტყვის როლში;

2) არ ხართ მთავრობის მხარდამჭერი, მაგრამ საკმარისად სულელი ხარ და ვერ ხვდები, რომ მსგავსი შემთხვევები შენც შეიძლება როდესმე გადაგხდეს, მიუხედავად იმისა, რომ აქამდე არასოდეს გადაგხდენია.

მსაჯი რომ მსაჯია, იმას უწევს ლანძღვის ატანა. ფეხბურთელსაც, კალათბურთელსაც, მსახიობსაც და ტელეწამყვანსაც…

მთავრობა, ზემოთჩამოთვლილი პროფესიებისაგან განსხვავებით, ბევრად უფრო მეტად წყვეტს ადამიანების ბედს, მათ შორის სიკვდილ-სიცოცხლის საკითხსაც. ის, ვისაც ამხელა ძალაუფლება აქვს, ვალდებულია მოითმინოს უკმაყოფილო ადამიანთა ლანძღვაც კი.