“თუ გავიხსენებთ ბელარუსის კგბ-სთან გაფორმებულ ხელშეკრულებას, ცხადი ხდება “ოცნების” გეზი და ტრაექტორია” – ნინო გოგაძე

მოძრაობა “დროას” ერთ-ერთი ლიდერის, ნინო გოგუაძის თქმით, საქართველოში ადგილობრივი თვითმმართველობის არჩევნებზე ბელარუსის ცესკო-ს დასწრება აღმაშფოთებელია.

 “როგორც მოგეხსენებათ, 2 ოქტომბერს საქართველოში უმნიშვნელოვანესი არჩევნებია დანიშნული. ამ არჩევნებს მრავალი ქვეყნის სხვადასხვა ორგანიზაცია დაესწრება დამკვირვებლად. აღმაშფოთებელია ამ ჩამონათვალში ბელარუსის ცესკო-ს ხილვა. მოგეხსენებათ, რომ ბელარუსში დიქტატურაა დამყარებული. ბოლო საპრეზიდენტო არჩევნები კი ცესკომ ისე გააყალბა, რომ 100 ათასობით ბელარუსის მოქალაქე ხანგრძლივ საპროტესტო აქციებს შეუერთდა. ლუკაშენკოს ბრძანებით, ხალხი არაერთხელ სასტიკად დაარბიეს, დააპატიმრეს, ათასობით ადამიანი აწამეს. იყო მსხვერპლიც. ეს დაუნდობელი უსამართლობა ეფუძნებოდა სწორედ ცესკო-ს ოფიციალურად გამოქვეყნებულ მონაცემებს.

თუ გავითვალისწინებთ საქართველოს ხელისუფლების წარმომადგენლების სრულიად აგდებულ დამოკიდებულებას დასავლური დემოკრატიული ინსტიტუტებისა და მათ რჩევების მიმართ და გავიხსენებთ ამავე დროს სულ ცოტა ხნის წინ ბელარუსის კგბ-სთან გაფორმებულ ხელშეკრულებას, სრულიად ცხადი ხდება “ქართული ოცნების” ხელისუფლების გეზი და ტრაექტორია. ამიტომ, 2 ოქტომბრის არჩევნები არის უმნიშვნელოვანესი არჩევნები ჩვენი სახელმწიფოს დამოუკიდებლობის და თავისუფლებისათვის. კარგად უნდა დავინახოთ, რომ პუტინის და ლუკაშენკოს რეჟიმთან შეხმატკბილებული “ქართული ოცნება” უნდა ჩამოვაშოროთ ხელისუფლებას”