“პატრიოტთა ალიანსის” ლიდერი, ირმა ინაშვილი:
დიუშენის სინდრომით დაავადებულ ბავშვებს და მათ მშობლებს კობახიძემ უპასუხა, რომ წამალი ძალზედ ძვირია, ეს ხალხის ფულია და ხალხის ფულს, თურმე, მთავრობა ვერ გამოიყენებს მედიკამენტის შესაძენად. აქვე რამდენჯერმე ახსენა ფარმაცევტული მაფია (დიფსთეითის ჟანრში) და მოკლედ გავიგეთ, რომ ისრები გადატანილია… არსაით.
ხალხის ფული…
როდის აქეთ გაუჩნდა კობახიძეს ასეთი გულდათუთქული დამოკიდებულება ხალხის ფულის მიმართ?! ახლა ეს, მართლა, ტრაგიკომედია არ არის?! ხალხის ამ ფულიდან რამდენი მილიონი იხარჯება სახელმწიფო მოხელეების წვეულებებში, ბანკეტებში, განახლებულ ავტოპარკში, თითიდან გამოწოვილ, უაზრო ღონისძიებებში, თითქოს ხალხს ეკითხებიან: შეიძლება, ხელფასები გავიზარდოთ და ბანკეტები მოვიწყოთ თქვენი ფულითო?! ხალხს ვინმე რამეს ეკითხება საერთოდ? ხალხის ფულიდან რამდენი ტენდერი წაიღეს ფეოდალების ბიზნესკომპანიებმა? რამდენი საბავშვო ბაღი და უფასო სასადილო გაძარცვეს? ძალიან სამარცხვინო და სავალალოა, რაც ხდება. განა დიუშენის სინდრომით დაავადებული ბავშვები და მათი მშობლები “ხალხი” არ არის? გადასახადების სახით, წვლილი არ შეაქვთ ბიუჯეტში? ვიღაცა თუ მრავალმილიონიან ტენდერს და გაასმაგებულ პრემიას იმსახურებს, ეს ბავშვები არაფერს იმსახურებენ? გრცხვენოდეთ!
ეკონომიკა იზრდება, ევროპულ ქვეყნებს გადავასწარით ზრდაშიო, თუ ასეთი მზარდი ეკონომიკა გაქვთ, ხალხის ფულს რას უთვლით ამ ბავშვებს? მაგრამ ეკონომიკა თქვენთვის იზრდება, ბიუჯეტიც თქვენი საკუთრებაა, ბარემ პასპორტები შეცვალეთ და დააწერეთ: ფეოდალური საქართველო.
რეფერენდუმისმაგვარი გამოკითხვა რომ ჩატარდეს, დარწმუნებული ვარ, სწორედ ხალხის აბსოლუტური უმრავლესობა დაუჭერს მხარს ამ ბავშვებისთვის წამლის შეძენას, მაგრამ მთავარი აქ მარტო სახსრები კი არაა, დამოკიდებულებაა… ხელისუფლების პირველი პირების უგულო, ცივი, არაკომპეტენტური, შეუვალი, ჯიუტი და ცინიკური დამოკიდებულება. ასეთი ხალხი არ იმსახურებს ხელისუფლებას, ხოლო ბავშვები იმსახურებენ სიცოცხლეს.
კომენტარები