“თორმეტივე ტენდერი, არის გამოცხადებული წინა მერის პერიოდში. 9 არის განხორციელებული, ხოლო 3 იქნა ჩავარდნილი და ხელახლა გამოცხადებული უკვე ჩვენ მიერ”, – ასე პასუხობს წალენჯიხის მუნიციპალიტეტის მერის პირველი მოადგილე, ივანე ბურდული, საქართველოს მუნიციპალური განვითარების ცენტრის დირექტორის, დავით ტაბიძის განცხადებას, რომლის თანახმადაც “განახლებული რეგიონების” ფარგლებში წალენჯიხის მუნიციპალიტეტის მერია ფონდს არ ეთანამშრომლება.
“წალენჯიხაში ხორციელდება ბევრი კარგი პროექტი, საზოგადოება ამას ნათლად ხედავს. ცენტრალური ხელისუფლებისთვის, როგორც ჩანს, ეს მიუღებელია და მათთვის უფრო მისაღებია ჩვენი დისკრედიტაცია, ვიდრე, ხალხზე ზრუნვის დადასტურების გარკვეული ფაქტები. რაც შეეხება ტაბატაძის განცხადებას, მინდა აღვნიშნო, რომ 12-ვე ტენდერი, არის გამოცხადებული წინა მერის პერიოდში. 9 არის განხორციელებული, ხოლო 3 იქნა ჩავარდნილი და ხელახლა გამოცხადებული უკვე ჩვენ მიერ. ანუ, მათ მიერ შერჩეული შემსრულებლები, როგორც ჩანს ვერ აღმოჩნდნენ სრულყოფილები და ვერ შეასრულეს დაკისრებული ვალდებულება. შესაბამისად, ჩვენ იძულებულნი გავხდით, რომ სამი მათგანისთვის შეგვეწყვიტა ხელშეკრულება და ხელახლა გამოგვეცხადებინა ტენდერები. დღეს, უკვე ორ მათგანზე დაკონტრაქტებულია და მიმდინარეობს მუშაობა, ხოლო დარჩენილ ერთზე, შემდეგ კვირას ახალი ტენდერი გამოცხადდება”, – განაცხადა ივანე ბურდულმა.
როგორც ჩანს, საქართველოს მუნიციპალური განვითარების ცენტრს არ აქვს ინფორმაცია არც იმაზე, რომ ეს ტენდერები წინა ხელისუფლების პირობებში გამოცხადდა, არც იმაზე, რომ 9 უკვე განხორციელებულია, არც იმაზე, რომ 3 ჩავარდა, არც იმაზე რატომ ჩავარდა ეს 3 ტენდერი, არც იმაზე, რომ ხელახლა გამოცხადდა 3 ტენდერი, არც იმაზე, რომ ორ ტენდერზე უკვე გაფორმდა ხელშეკრულება. თუმცა, აღსანიშნავია მისი გულწრფელი აღიარება, რომ – არ იცის. არადა, ამის გადამოწმება, ძალიან მარტივია, არათუ მუნიციპალური განვითარების ცენტრისთვის, არამედ, მოქალაქისთვისაც კი. იმ შემთხვევაში, თუ დავით ტაბიძეს ექნება კომენტარი, რატომ არ ფლობს ამ ტიპის ინფორმაციებს, “ალია” მასალას გაახლებს.
ცნობისთვის, საქართველოს მუნიციპალური განვითარების ცენტრის დირექტორმა განაცხადა ისიც, რომ ფონდს “განახლებული რეგიონების” ფარგლებში წალენჯიხის მუნიციპალიტეტის მერია არ ეთანამშრომლება. „შევეცადეთ, ყველას მხრიდან მაქსიმალური ჩართულობა ყოფილიყო. სამწუხაროდ, წალენჯიხა არის ის ადგილი, სადაც ჩავედით თუ დავრეკეთ, არაფერი გამოვიდა. თანამშრომლობა გვინდოდა და არ გამოგვივიდა. შემთხვევა გვქონდა, როცა მერი ადგილზე საერთოდ არ დაგვხვდა”, – აღნიშნა ტაბიძემ.
თავის მხრივ, წალენჯიხის მუნიციპალიტეტის მერის პირველი მოადგილე განმარტავს, რომ ცენტრალური ხელისუფლების წარმომადგენლების მხრიდან მსგავსი ტიპის კომუნიკაციის მცდელობაც კი არ ყოფილა, უფრო მეტიც, ივანე ბურდულის თქმით, ცენტრალური ხელისუფლებიდაბ წალენჯიხაში ამ დრომდე, არც ერთი მაღალჩინოსანი არ ჩამოსულა.
“დაასახელონ თარიღი და ვითარება, როდის ჩამოვიდნენ, ვის მიაკითხეს, სად მოვიდნენ, შენობაში როდის იმყოფებოდნენ და მე როდის დამირეკეს, ან გია ხარჩილავას?! არანაირი მსგავსი კომუნიკაცია არ შემდგარა, ერთი ზარიც არ განხორციელებულა და თუ აინტერესებთ, როგორ და რა ხორციელდება წალენჯიხაში, ჩამობრძანდნენ და ნახონ ადგილზე. ვაჩვენებ, დავათვალიერებინებ და აღსანიშნავია, რომ არც ერთი მაღალი ხელისუფლების წარმომადგენელი აქამდე წალენჯიხაში არ ჩამობრძანებულა”, – განმარტა ივანე ბურდულმა.
იმ შემთხვევაში, თუ დავით ტაბიძე განმარტავს, როდის იყო ჩასული წალენჯიხაში და ვინ არ შეუშვა მერიაში, ან განმარტავს, როგორ მოხდა, რომ იმდენად დაუგეგმავად და “ჩუმად” ჩავიდა წალენჯიხაში, რომ ვერავინ გაიგო – “ალია” მასალას გაახლებს.
ვიდეოკომენტარი – გამოცემა თაიმერი
კომენტარები