The Guardian: ამერიკელი გენერლები გეგმის განსახილველად, შესაძლოა, მოსკოვში ჩავიდნენ

ამერიკელი გენერლების ჯგუფი, შესაძლოა, მომავალ კვირას მოსკოვს ეწვიოს და კრემლთან სამშვიდობო გეგმა განიხილოს. ინფორმაციას The Guardian ავრცელებს.

გამოცემის თანახმად, აშშ-ის სამხედრო მაღალჩინოსნების დელეგაციამ, რომელსაც არმიის მდივანი დენ დრისკოლი ხელმძღვანელობდა, კიევში უკრაინის პრეზიდენტ ვოლოდიმირ ზელენსკისთან მოლაპარაკებები ხუთშაბათს გამართა.

The Guardian-ი წერს, რომ ტრამპმა დრისკოლი თავის ახალ სპეციალურ წარმომადგენლად დანიშნა.

22 ნოემბერს ღამით რუსეთის პრეზიდენტმა, ვლადიმირ პუტინმა უშიშროების საბჭოს სხდომაზე განაცხადა, რომ იგი ეთანხმება აშშ-ის მიერ წარდგენილ 28-პუნქტიან სამშვიდობო გეგმას.

რამდენიმე დღის უკან ამერიკულმა მედიამ გამოაქვეყნა აშშ-ის ახალი სამშვიდობო გეგმის პუნქტების სრული სია, რომელიც განსახილველად უკრაინას გადაეცა.

გავრცელებული ინფორმაციით, გეგმა, სხვა საკითხებთან ერთად, მოიცავს:

უკრაინის მიერ NATO-ში გაწევრიანებაზე უარის თქმას.

რუსეთის მიერ ოკუპირებული ყირიმის, ლუგანსკისა და დონეცკის დე ფაქტო რუსულად აღიარებას.

ხერსონისა და ზაპოროჟიეს (ამჟამინდელი ფრონტის ხაზის გასწვრივ) რუსეთის კონტროლქვეშ აღიარებას.