თბილისში წინასაახალწლო დღეებში დაშვებული გამონაკლისი მოიხსნა და BUS Lane-ზე მანქანით მოძრაობა ისევ აკრძალულია.
წესის დარღვევისთვის მოქალაქეები ისევ დაჯარიმდებიან. ჯარიმა “ადმინისტრაციულ სამართალდარღვევათა კოდექსით” 100 ლარია.
გამონაკლასიის სახით, თბილისის მერიამ წინასაახალწლო დღეებში გზების გადატვირთვის მიზნით 25 დეკემბრიდან 31 დეკემბრის ჩათვლით BUS Lane-ზე ყველა ტიპის ტრანსპორტის გადაადგილება დაუშვა.
“გაცნობებთ, რომ მას შემდეგ, რაც მუნიციპალური ტრანსპორტის ფუნქციონირება დროებით შეჩერდა, კერძო სატრანსპორტო საშუალებების გადაადგილების მაჩვენებელი 20%-ით არის გაზრდილი… აღნიშნული გადაწყვეტილება გარკვეულწილად, ტრანსპორტის მომატებულ ნაკადებს თავისუფლად გადაადგილების საშუალებას მისცემს”, – აღნიშნავდნენ მაშინ მერიაში.
თბილისში საზოგადოებრივი ტრანსპორტი 28 ნოემბრის შემდეგ გაჩერებულია. ამ დროიდან მოქალაქეებს გადაადგილება ტაქსით ან პირადი მანქანით უწევთ. საზოგადოებრივი ტრანსპორტი 24 დეკემბრიდან უნდა ამუშავებულიყო, მაგრამ საკოორდინაციო საბჭომ შეზღუდვა ძალაში დატოვა. საზოგადოებრივი ტრანსპორტის გაჩერების შემდეგ დედაქალაქის ქუჩებში საცობები გაჩნდა.
კომენტარები