ამ დროისთვის შეიძლება ცალსახად ვთქვათ, რომ ივანიშვილის რეჟიმი და მისი მსახური პარტაქტივი, საარჩევნო დღის ბოლოს მის ხელთ არსებულ აბსოლუტურად ყველა ბერკეტს იყენებს იმისთვის, რომ დაამახინჯოს თქვენი, საქართველოს მოქალაქეების არჩევანი, – ამის შესახებ „ძლიერი საქართველო – ლელოს“ ერთ-ერთმა ლიდერმა, თაზო დათუნაშვილმა ბრიფინგზე განაცხადა.
თაზო დათუნაშვილის თქმით, საარჩევნო უბნებზე მიმდინარეობს კამერების წინააღმდეგ ბრძოლა, თუმცა მათმა კამერებმა უკვე დააფიქსირეს დარღვევები, მათ შორის იყო „კარუსელის“ შემთხვევაც.
„ქართული ოცნება“ იწყებს ფაქტების მალვას, შედის ერთგვარი კრიმინალური აქტივობის ბოლო ფაზაში და მთელი თბილისის მასშტაბით დაერია ჩვენს კამერებს და დაიწყო მათი გათიშვა. გამორჩეულად აქტიურობს პოლიტიკური პირუტყვობით სამგორის ოლქი, სამგორის მე-10, მე-20, 33-ე, 37-ე, 38-ე, 39-ე, მე-40, 47-ე, 51-ე და 72-ე უბნებზე „ქართული ოცნების“ კონტროლირებადმა უბნის თავმჯდომარეებმა ჩვენი კანონიერად და ცესკო-ს ყველა მოთხოვნის შესაბამისად დამონტაჟებული კამერები გათიშეს მე-10 უბნიდან გააძევეს წარმომადგენელი. ანალოგიური ვითარებაა თბილისის სხვა უბნებზე. სამგორი ყველაზე მეტად აქტიურობს.
ეს არის მიზანმიმართული კამპანიური ქმედება, რომელიც მოდის ვერტიკალის ცენტრიდან, ცესკო-დან, სადაც გაყალბების ტვინი იყრის თავს და მიზანი არის, რომ დღის მეორე ნახევარში უბნებზე კრიმინალური აქტივობა არ აისახოს ჩვენს კამერებზე. ამის მიუხედავად ჩვენმა კამერებმა უკვე დააფიქსირეს ე.წ. კარუსელის რამდენიმე კონკრეტული ფაქტი, რომელზეც არსებობს ვიდეომტკიცებულებები. ეს კარუსელის ფაქტები არის ვაზისუბნის 54-ე და 49-ე უბნებზე, როდესაც მოგზაური, მარკო პოლო ამომრჩევლები რამდენიმე უბანზე აძლევენ ხმას.
ჩვენი კამერების წინააღმდეგ ბრძოლა დაიწყეს ჩვეულებრივი ჯიბგირული მეთოდებით. პირველ ეტაპზე უბნის უფროსები, უბნის თავმჯდომარეები ცდილობენ მორალურად იძალადონ ჩვენს წარმომადგენლებზე და კომისიის წევრებზე, შემდეგ ბრძოლაში ერთვება საოლქო საარჩევნო კომისიისა და ცენტრალური საარჩევნო კომისიის წარმომადგენლები, რომლებიც მოგონილი მიზეზებით ცდილობენ, რომ კამერები აიღონ“, – განაცხადა თაზო დათუნაშვილმა.
კომენტარები