დაკავებული აქტივისტი, თამარ ლორთქიფანიძე პროცესზე ცუდად გახდა – საქალაქო სასამართლოში სასწრაფო დახმარება გამოიძახეს. როგორც ადგილიდან “ტვ პირველის” კორესპოდენტი იუწყება, ქალი ამ წუთებში, კლინიკა “ვივა მედში” გადაჰყავთ.
დღეს, თბილისის საქალაქო სასამართლოში თამარ ლორთქიფანიძის ორი პროცესი იყო ჩანიშნული სისხლის სამართლის და ადმინისტრაციული სამართალდარღვევის ფაქტებზე.
პროცესს მოსამართლე თორნიკე ქოჩქიანი უძღვებოდა, რომელსაც სამოქალაქო აქტივისტი ქალის უფლებადამცველმა, გუჯა ავსაჯანიშვილმა არაერთხელ მიუთითა, რომ მისი დაცვის ქვეშ მყოფი შეუძლოდ იყო, თუმცა მოსამართლემ სასწრაფო დახმარება არ გამოიძახა.
მას შემდეგ, რაც დაკავებული ქალის მდგომარეობა გაუარესდა უფლებადამცველმა თავად გამოიძახა სასწრაფო დახმარება. ადგილზე მისულმა მედიკოსებმა თამარ ლორთქიფანიძის კლინიკაში გადაყვანის გადაწყვეტილება მიიღეს.
შეგახსენებთ, რომ თამარ ლორთქიფანიძეს, რომელიც 22 ოქტომბერს აქციაზე პოლიციის მანქანაზე ავიდა პროკურატურა პოლიციელის სატრანსპორტო საშუალებაზე თავდასხმას და ტაქსის მძღოლის ცემას ედავება.
მას 25 ოქტომბერს აღკვეთის ღონისძიების სახით პატიმრობა შეეფარდა.
ბრალის დამტკიცების შემთხვევაში აქტივისტს 4-დან 7 წლამდე თავისუფლების აღკვეთა ემუქრება.
კომენტარები