“თალაკვაძე იდიოტი ნამდვილად არაა, ვალდებულია თავი მოიდებილოს, ვითომ სენატორ რიშის აზრი ვერ გაიგო” – გია ნოდია

ექსპერტი გია ნოდია სოციალურ ქსელში მიმართვას ავრცელებს, სადაც წერს, რომ სახელისუფლებო პარტიას კრიტიკაზე პასუხი არა აქვს.
ამასთან, ნოდია არჩილ თალაკვაძის განცხადებას აფასებს, სადაც ის აშშ-ის სენატის საგარეო ურთიერთობების კომიტეტის წევრის, ჯიმ რიში განცხადების საპასუხოდ ამბობს, რომ – “მე უფრო ასე გავიგე ეს განცხადება, რომ ბატონი რიში იმედგაცრუებულია ოპოზიციის მიერ მიღებული შედეგებით.”

“გასაგებია, რომ „ქართული ოცნების“ პიარი მთლიანად აგებულია წანამძღვარზე, რომ ხალხი ბნელია, ლოგიკა და დასაბუთება არ სჭირდება, აშკარა სისულელეს ხშირად რომ გაუმეორებ, დაიჯერებს. 
შეიძლება, მთლად მტყუანები არ არიან: ფაქტია, რომ ასეთი პიარი მოსახლეობის დიდ ნაწილზე მუშაობს. მაგრამ ეს იმასაც ნიშნავს, რომ პიარის მწარმოებლებმა (ხელისუფლების “სახეებმა”) თავიც უნდა მოისულელონ. 
ამ შემთხვევაში, არჩილ თალაკვაძე, რომელიც იდიოტი ნამდვილად არ არის, ვალდებულია თავი მოიდებილოს, ვითომ სენატორ რიშის აზრი ვერ გაიგო: სხვანაირად „გუნდის“ მესიჯ-ბოქსში ვერ ჩაჯდები. მეორეს მხრივ, ისეც შეიძლება გავიგოთ, რომ ის ამ ადამიანს, ამერიკელ სენატორს, ღიად ეკაიფება, როგორც შინაურ კრიტიკოსებთანაა შეჩვეული. ორივე აუდიტორიაზე მუშაობს: დებილებთან თავს იდებილებს, შედარებით „პრაძვინუტებს“ თვალს უკრავს, რა მაგრად წავიღადავეო. ნებისმიერ შემთხვევაში სახელისუფლებო პარტიას კრიტიკაზე პასუხი არა აქვს და სერიოზულ დისკუსიაში შესვლა ხელს არ აძლევს. მისი პასუხი ერთია: ხომ ავიღეთ ჩვენი 47 პროცენტი, აწი იძახეთ, რაც გინდათ.,” – წერს ნოდია.
ცნობისთვის, პარლამენტის ვიცე – სპიკერმა არჩილ თალაკვაძემ სენატორ რიშის განცხადების საპასუხოდ განაცხადა, რომ – “მე უფრო ასე გავიგე ეს განცხადება, რომ ბატონი რიში იმედგაცრუებულია ოპოზიციის მიერ მიღებული შედეგებით, ვინაიდან ამ არჩევნებში საარჩევნო კანონმდებლობის თვალსაზრისით და საარჩევნო გარემოს გათვალისწინებით, ოპოზიციას ჰქონდა შესაძლებლობა, კონკურენტულ რეჟიმში მიეღო მეტი მხარდაჭერა. ჩვენ ვამბობდით, რომ „ქართულ ოცნებას” საპარლამენტო არჩევნებში მიღებული მხარდაჭერა, რომელიც ჰქონდა, იყო ნამდვილი, ლეგიტიმური, 7 – თვიანი ხელოვნური საბოტაჟი და კრიზისი, რაშიც ბატონი რიშის ჩართულობა, ასევე ჩვენი ევროპელი კოლეგების ჩართულობა გახდა საჭირო, რათა მოლაპარაკებები დასრულებულიყო, ოპოზიცია შემოსულიყო პარლამენტში. რასაკვირველია, დღეს კიდევ ერთხელ დადასტურდა, რომ ჩვენს მიერ მიღებული შედეგი იყო ლეგიტიმური და ნამდვილი. მე პირადად ასე წავიკითხე ეს განცხადება,” – განაცხადა თალაკვაძემ.