ბრიტანულ-ქართული აკადემიისა და თბილისის ბრიტანული საერთაშორისო სკოლის დამფუძნებლები, დავით ცეცხლაძე და ნათია ჯანაშია განცხადებას ავრცელებენ, რომლის თანახმადად, ფინანსური სამინისტროს საგამოძიებო სამსახურმა დაიწყო გამოძიება “დანაშაულის ნიშნების შემცველ არაერთ ფაქტზე, სადაც ფიგურირებენ სს „საქართველოს კაპიტალის“ გენერალური დირექტორი ირაკლი გილაური, შპს „ბრიტანულ ქართული აკადემიის“ არალეგიტიმური დირექტორი გიორგი კეთილაძე და სს „საქართველოს ბანკის“ აღმასრულებელი დირექტორი არჩილ გაჩეჩილაძე.”
გვსურს საზოგადოებას ვაცნობოთ, რომ საქართველოს ფინანსთა სამინისტროს საგამოძიებო სამსახურმა დაიწყო გამოძიება შესაძლო სისხლის სამართლის დანაშაულის ნიშნების შემცველ იმ ფაქტებთან დაკავშირებით, სადაც ფიგურირებენ სს „საქართველოს კაპიტალის“ გენერალური დირექტორი ირაკლი გილაური, შპს „ბრიტანულ ქართული აკადემიის“ არალეგიტიმური დირექტორი გიორგი კეთილაძე და სს „საქართველოს ბანკის“ აღმასრულებელი დირექტორი არჩილ გაჩეჩილაძე.
ფაქტები, რომლებზეც დაწყებულია გამოძიება, მოიცავს შემდეგი დანაშაულის ნიშნებს:
- ბრიტანულ-ქართული აკადემიის წილის თაღლითური გზით მითვისება
- საჯარო რეესტრში დოკუმენტების გაყალბება და უკანონოდ სკოლის დირექტორის გადაყენება
- ბრიტანულ-ქართული აკადემიის კუთვნილი დიდი ოდენობით (3.2 მილიონი ლარი) ფულადი სახსრების მითვისება
- ბრიტანულ-ქართულ აკადემიასთან დაკავშირებული ინსაიდერული ფინანსური და კომერციული ინფორმაციის უკანონო გამჟღავნება
ზემოაღნიშნული ქმედებები შეიცავს საქართველოს სისხლის სამართლის კოდექსით გათვალისწინებულ მძიმე დანაშაულის ნიშნებს, რომლებზეც სასჯელის სახედ გათვალისწინებულია 7-დან 11 წლამდე თავისუფლების აღკვეთა.
შესაძლო დანაშაულის შემცველი ფაქტების შესახებ უკვე ვაცნობეთ დიდი ბრიტანეთის ფინანსური ქცევის ორგანოს (Financial Conduct Authority — FCA), სადაც მიმდინარეობს დამატებითი ზედამხედველობითი პროცედურების განხორციელება „საქართველოს კაპიტალისა“ და „საქართველოს ბანკის“ ხელმძღვანელი პირების მიმართ.
ჩვენ მიერ წარდგენილი ფაქტების საფუძველზე, ლონდონის საფონდო ბირჟასთან (London Stock Exchange) და მის მარეგულირებლებთან მიმდინარეობს განხილვა საქართველოს კაპიტალისა (Georgia Capital PLC) და საქართველოს ბანკის ჯგუფის (Bank of Georgia Group PLC) საქმიანობისა და მათი საფონდო ბირჟიდან შესაძლო გარიცხვის საკითხზე, რაც უკავშირდება რეგულირების ქვეშ მყოფი იურიდიული პირების ხელმძღვანელების მიერ შესაძლო დანაშაულის ნიშნების შემცველი ქმედებების ჩადენასა და მმართველობით დარღვევებს.
გარდა ამისა, თაღლითობის, დოკუმენტების გაყალბების, დამფუძნებლების მოტყუების, დიდი ოდენობით თანხების მითვისების, ინსაიდერული ინფორმაციის გამჟღავნების ფაქტებისა და სხვა სამართლებრივი დარღვევების გამო, ლონდონის საფონდო ბირჟისა და შესაბამისი მარეგულირებლების წესების შესაბამისად, ვითხოვთ ირაკლი გილაურისა და არჩილ გაჩეჩილაძის თანამდებობიდან გადაყენებას გამოძიების დასრულებამდე.
იმედი გვაქვს, რომ დროული და სამართლიანი გამოძიება პასუხს გასცემს ყველა იმ კითხვას, რაც ბრიტანულ-ქართული აკადემიის დამფუძნებლებს, სასკოლო საზოგადოებას, მარეგულირებელ ორგანოებსა თუ ყველა იმ პირს აქვს, ვისთვისაც ჩვენი სკოლები ღირებული და მნიშვნელოვანია, – წერია განცხადებაში, რომელსაც ბრიტანულ-ქართული აკადემიისა და თბილისის ბრიტანული საერთაშორისო სკოლის დამფუძნებლები, დავით ცეცხლაძე და ნათია ჯანაშია ავრცელებენ.
(R)
კომენტარები