პარტია “მოქალაქეების” ლიდერის, ალეკო ელისაშვილის შეფასებით, შეთანხმების მიღწევისკენ გზა მოჭრა როგორც “ქართულმა ოცნებამ”, ისე ოპოზიციამ.
ელისაშვილი უარყოფითად აფასებს “ქართული ოცნების” ინიციატივას პარტიებისთვის დაფინანსების შეწყვეტისა და გარკვეული პოლიტიკური ძალისთვის რეგისტრაციის გაუქმების შესახებ; ამასთან, მიიჩნევს, რომ მოლაპარაკების პროცესს ოპოზიციის მხრიდან მანდატებზე უარის თქმა და პარტიული სიების ჩახსნაც აზიანებს.
“სულ უფრო მცირდება მოლაპარაკების შანსი და ის კარი სულ უფრო იხურება როგორც ერთი მხრიდან, ისე მეორე მხრიდან. დაფინანსების შეწყვეტაზე, პარტიების რეგისტრაციის გაუქმებაზე შანტაჟის ენით ლაპარაკობს “ქართული ოცნება” და კობახიძე, და, მეორეს მხრივ, ოპოზიცია თან იძახის, რომ მოლაპარაკებები მინდაო და თან სიებს აუქმებს და მანდატებს ხევს, რაც შეურაცხმყოფელია ხალხისთვისაც და ელჩებისთვისაც, რომლებმაც ამაში უზარმაზარი შრომა ჩადეს. სულ უფრო ცოტა შესაძლებლობა რჩება, რომ შევთანხმდეთ,”-განაცხადა მან.
მოლაპარაკების შესაძლებლობას სკეპტიკურად უყურებს “გირჩის” ერთ-ერთი ლიდერი იაგო ხვიჩიაც, თუმცა, იმედოვნებს, რომ გარკვეული შანსი მაინც არსებობს.
“არ ვიცი, რომ გითხრათ, წარმატების იმედი უნდა მქონდეს თუ არა იმ პირობებში, როდესაც ხელისუფლება აშანტაჟებს მაგიდასთან მსხდომ პოლიტიკურ პარტიებს და დაშლით ემუქრება, მაგრამ მჯერა, რომ შეიძლება გამოფხიზლების შანსი არსებობდეს. როდესაც დავინახავთ, რომ უპატივცემულოდ ვიქცევით ერთადერთ ინსტიტუციასთან, ერთადერთ ადამიანთან, რომელიც ამ ქვეყანაში ნდობით სარგებლობს და თუ რამე გაგვიჭირდება, იქ უნდა მივირბინოთ, მგონია, რომ შეიძლება ამას მივხვდეთ. ამის მიხვედრის პოტენციალი რომ ჰქონდეს როგორც ხელისუფლებას, ისე ოპოზიციას, არ გამოვრიცხავ,”-განაცხადა იაგო ხვიჩიამ.
კომენტარები