სტუდენტების განცხადება აქციაზე – რა იქნება მათი შემდგომი ნაბიჯი?

ამ წუთებში, აქციაა ილიაუნის უნივერსიტეტთან. აქციაზე გავრცელდა სტუდენტების განცხადება:

დღეს ქართულმა ოცნებამ კვლავ გადადგა ანტიეროვნული ნაბიჯი და ჩამოართვა სახელმწიფო უნივერსიტეტებს პროგრამების უმრავლესობა, მათ შორის, ილიაუნსაც. ეს ფაქტობრივად, ყველა მათგანის დახურვას ნიშნავს. 

ამ გადაწყვეტილებით საფრთხე ემუქრება უნივერსიტეტების ღირებულებას, იდენტობას და ილიასეულ თავისუფლებისადმი სწრაფვის იდეას, რომელიც დღეს ათასობით კურსდამთავრებულს აერთიანებს. 

აქ შეკრებილი სტუდენტები ერთხმად ვითხოვთ, ე.წ. რეფორმის გაწვევას, უნივერსიტეტების ავტონომიურობის ხელშეუხებლობასა და სრულფასოვანი განათლების უფლებას.

მოვუწოდებთ ყველას, პროფესორ–მასწავლებლებსა და აკადემიურ პერსონალს დაუმორჩილებლობისა და წინააღმდეგობისაკენ. არ შეცვალოთ არსებული კურიკულუმები, ყველა შესაძლო ფორმით გააპროტესტეთ პროგრამების გაუქმება. 

სტუდენტებო, ჩვენ ვართ გვერდი–გვერდ, ჩვენ უკან კი არიან ჩვენი მშობლები, ოჯახები და საქართველოს წარსული. ჩვენ პირველ რიგში ვართ მოქალაქეები და შემდეგ სტუდენტები. შესაბამისად, ვაცნობიერებთ პასუხისმგებლობას სამშობლოს, ისტორიისა და მომავლის წინაშე. ამიტომ, კვირას, 15 საათზე, ვიკრიბებით დედაენის ბაღში, დედაენის მონუმენტთან, რომელიც გვახსენებს სტუდენტების წინააღმდეგობის ძალასა და ერთობას. 

ძალა სტუდენტების ერთობაშია.

დამხობა რეჟიმს და თავისუფლება რეჟიმის პატიმრებს!