სტომატოლოგები ქვეყნის “მთავარი სტომატოლოგის” წინააღმდეგ – რას ედავებიან მინისტრს?

ახალი პროტესტი ჯანდაცვის მინისტრის წინააღმდეგ – სტომატოლოგები ეკატერინე ტიკარაძის გადაწყვეტილებას აკრიტიკებენ. ტიკარაძის გადაწყვეტილების თანახმად, ეპიდემიის გამო,  სტომატოლოგიური კლინიკები საქმიანობის გაგრძელებას მხოლოდ უსაფრთხოების განსაკუთრებული ნორმების დაცვის შემთხვევაში შეძლებენ. 

მედიკოსების განმარტებით, მსგავსი მკაცრი მოთხოვნების დაცვას კლინიკები ვერ შეძლებენ, ვინაიდან ქვეყანაში სპეციალური აღჭურვილობის მარაგი არ არსებობს. აქედან გამომდინარე, კლინიკის მენეჯერები მომსახურების გაძვირებას არ გამორიცხავენ.

ახალი ალგორითმის მიხედვით, პირველ ეტაპზე, ექიმებმა გადაუდებელი და მწვავე პაციენტები უნდა მიიღონ; მეორე ალგორითმის მიხედვით, გადაუდებელი პაციენტები კოვიდ 19-ზე უნდა შემოწმდნენ; მესამე ალგორითმი კი ქირურგიული ჩარევის შედეგად არსებულ რისკებს შეაფასებს. მომსახურების ფასი განისაზღვრება იმის მიხედვით, რა ტიპის სამედიცინო აღჭურვილობას გამოიყენებს ექიმი. სტომატოლოგები არ გამორიცხავენ, რომ მომსახურების ფასის ზრდამ პაციენტების შემცირება გამოიწვიოს. 

22 მაისამდე სტომატოლოგიური კლინიკები პაციენტებს მხოლოდ გადაუდებელი აუცილებლობის შემთხვევაში მიიღებენ. თბილისში საგანგებო რეჟიმში სულ 17 კლინიკა მუშაობს, ქუთაისში – 6, ზუგდიდში – 2, ბათუმში კი 4. რუსთავში, სენაკში, წალენჯიხასა და კასპში კი თითო-თითო კლინიკა მუშაობს.

სტომატოლოგიური დაწესებულებების წარმომადგენლებმა არ იციან, როდემდე ეყოფათ არსებული მარაგები ან რამდენად გაძვირდება შესაბამისი სამედიცინო აღჭურვილობა. 

სიმბოლურია, რომ მინისტრი პროფესიით თავადაც სტომატოლოგია და შესაბამისად, ყველაზე კარგად უნდა ესმოდეს მათი პრობლემების.

წყარო – მთავარი